|
İMAM GAZİ MUHAMMED
Avari cinconi do 1793 3’anas Gimris dobaderi İmam Gazi Muhammed, K’avk’asiaşi muridizmiş do gazavatişi İmam Mansuriş k’uleni majurani go3’oncğoneri ren. Mutevazi, stibineri mara xatibi do k’araroni imami yado içinen. Medreses İslamuri çkinape do Arabuli nena iguru. Nakşibendi tarik’atişi murşidepeşen Kurali Muhammed do Şeyx Cemaleddini k’ala irtibati qu do tarik’atişi doloxe mk’ule oras didi şinapa mogu. Gazi Muhammedik xalk’işi ok’ok’atute yedgitinuşi gecginaşa icert’u do 1829 3’anas 36 3’aneri rt’uşi gamaçkvineri “İkametul Burhan Ala İrtidadi Urefai Dağistan” coxoni noç’are muşite dido inç’elinu. Camepes timoşletineroba temoni siaseturi vaazepe muşite 3.000 k’oçi k’orobu. 1829 3’anas imami goşi3xunu. İmametişi mak’amis rt’uşi namut 1829-1832 3’anapeşi oşkes Avari xanepeşi şkaguri Hunzahişa, Tarkuşa do Çeçenistanişa seferepe ge3’opxu muç’ot am noğape timoşletinerobaş k’abğa şeni didi mani şinupt’u.
14 K’undura 1830-s Hunzahişa nat’k’va3inus askerepe muşişi gverdi Şamilişi k’umandanobaşa meçu. Bahu Bikeşi go3’oncğonerobate xanobak k’aixeşa nodgitu do İmam Gazi Muhammmedişa mek’ireli 200 k’oçi doşehidu do 60 k’oçi esiri noktu. Aşote xanobaşi şkagurik Rusepeşi itimadi arçkva komogu. 1831 3’anaş k’ule Rusepe k’ala ok’abğinu geoç’k’u. Bornaya Venizagnoyaşi cixas Rusepeşa k’ap’et’i darbepe ixvenu. 17 Gimua 1832-s Gimri k’arta k’eleşen goibaz’ginu nati nodgitinus naqonu. Elak’ateri 15 mucahidi k’ala işehidu. P’at’i yaraleri mara moçitineri art k’oçi rt’u: İmam Şamili. Gazi Muhammedişi imamoba 1829-1832 3’anapeşi oşkes sum 3’anas naqonu. Emuşk’ule Hamzat Bek do emuşk’uleti İmam Şamili imami iqu.
Gazi Muhammedik, imami iquşi am simadape muşite xalk’is şuuri meçapt’u: “Germaluris, oxoşkva şeni xvameri cihadi maartani vazife uğut’asunon. Germaluris, k’oçişi, ocaxişi, miletişi do oxen3aleşi skidalaş maktale şeriatişa noqonu do oşinu majurani vazife uğut’asunon. Germaluri mitişi ç’operi var iqven, mitişa xaraci var meçaps. K’anonişi 3’oxle k’artayi musavi ren. Germalurik tutumi var şvasunon do nark’ot’ik’i var ixmarasunon. Şuri muşi oxvamute oz’ğasunon, umenceli var iqvasunon do sefahatişa var oxvaktasunon”.
|
TÜRKÇE
