DUDBUT'K'A

MT'K'APEŞİ GONT'ALERİ MULA

Mula, mulagilepeşi (Ulmaceae) familiaşen Ulmus cinsişi capeşi ç’eşidepes itkven. Kianaşi çuçuna t’arononi mintik’apes namut olande Amerik’as, Avrop’as do Asias irdenan do tak’ribi 18 ç’eşidi uğunan. Qinoras but’k’a dobğapan do ginz’e skidaloni cape renan. Dido puloni k’imp’irepe muşi helezonuri golonsvareli renan. Xila muşi ka3a uendosp’ermuli ren. Ker3elape muşi mçxu do t’k’va3eri ren. Ker3elape muşi perpu guin3’k’en. Galeni dişka muşi xçeala, doloxeni dişka muşi mç’ita ren. K’ap’et’i do monk’a dişka uğun. Darbepeşe naxondinen. Perpu var it’axen.

Mulapeşi namtinepe mskva z’irapa mutepe şeni p’ark’epes, steğopes do caddepes landeşi do k’ivran3’aşi ca yado irgenan. Namtinepeşi 3’k’arişa naxondinoni dişkaşen zuğaşi vasit’ape do mobilia ixvenen. Am capeşi irişen çkvaneri xususoba but’k’ape muşi ren. But’k’apeşi kinari mç’ipe amaqlant’a do m3’k’ili k’un3’uloni do tuden k’ele ğula ren. Majura otkute, but’k’ape muşiş oşke cerğvişi jur k’eleni burmepe, tude artneri sotis var ok’oinç’enan. Mulapeşi hunsa xususieti yani hemi daduli do hemiti mamuli organoni mç’ipe pukirepe purkinoraşi iptineri dğalepes but’k’apeşen 3’oxle guin3’k’enan. But’k’ape var imordinu şeni qapes xvala gexuneri mç’ipe pukirepe monç’inoraşi geç’k’alas xilaşa niktenan. Am xilape lat’ara do bundğoni msvapete gok’ireli ç’k’emişen met’a mutu va ren.

Turkias mulapeşi çkvaneri capete oxokteri sum ç’eşidi uğun. İrişen gont’aleri ç’eşidi muşi Avrop’a, olande Afrik’a, Asia do Turkiaşi k’arta sotis edo bilasa zenepes do ğalepeşi kinaris na irden zenuri mula (Ulmus carpinifolia) ren. T’ani muşi 40 met’re do mçxunoba muşi 1-2 met’re k’onari am ç’eşidi ginz’e oras skidun. Ginz’e ora skidaşi ker3ela muşi imçvanen do k’ut’ali t’k’va3eri z’irapa aqven do dişka galeni tesirepeşen çumers. Dişka muşi mamobilialobas ixmarinen. Mt’k’uri mula (Ulmus glabra), olande do geulva Avrop’as, geulva Asias do Turkiaşi Uçazuğa do k’arta mt’k’apes gont’aleri irden. Zenuri mulaşa mengaperi mara emuşen umosi narini hercai mula (Ulmus laevis) Turkias majura ç’eşidepeşen m3ika moixvaden.



                                                                                                                                                              TÜRKÇE