DUDBUT'K'A

ŞEYX AHMED CEZERİ

Kurduri ç’aralobaşi didi şairi, İslamuri kianaşi didi feylesofepeşen arteri ren. 1404-1479 3’anapeşi oşkes skidu. Coxo muşi Ahmed, lak’abi muşi Molla Cezeri (Melaye Ciziri) ren. Ocaxi muşi Botan aşiretişi mensubi ren. Baba muşi Şeyx Muhammed coxoni didi art alimi rt’u. Cizres 3’oxle baba muşiş xolos, uk’ule Diyarbekiri, İmadiye do Çolamergis ik’itxu. Malatia, St’amp’oli do yulva Anatoliaşi dido noğa do k’ezape goxtu do z’iru. İcazeti muşi Setrabasis eç’opu.

Cezeris, nananena muşi Kurdurişi k’arta lehçe edoxolo Arabuli, Farsuli do Turkuli nenape uçkit’u do k’aixeşa medreseşi k’ult’ura uğut’u. Amdğanerdğas Cizres came yado ixmarinen Medrasa Soris dido 3’anapes dersi meçu. Ahmed Cezerik ti muşi, Kurduri ç’areli 2.000 beyitoni divani muşite kianaşa oçinapu. Şiirepe muşi didote gazelişi, namtinepeti k’asideşi tarzite ç’aru. K’asidepe muşi Ellaşi qoropa, Resulellaşi qoropa, K’urani do hadisi temapete ç’aru. Tasavufi dido molaşinu, fenafilla (Ellaşi renobas gondunu) do vahdedi vucudi (renobaşi artoba) steri temape ç’aru. Sade nenate ç’aru do vecizi, mk’ule cumle do beyitepete otku unt’upe irişen mskva doloç’aru. Divani muşişi k’arta k’aside, uçodine edebiuri do feylesefuri art xazine ren. Şiirisi didi sanati ixmaru do k’arta misra artneri boncapete oçodinu. Yani albonuri boncaşi sira ixmaru.

Divani muşis Kurduri nena k’ala Arabuli do Farsuli nenapete ç’areli manzumepeti gez’in. Divanişi çodinas Emir İmaduddini k’ala Kurduri musacelepe do Fakih Muhammed Tayrani k’ala Kurduri manzumi mukalemepe gez’in. Divani iptinero, Sult’anahmed cameşi dudimami Şeyx Muhammed Şefik Arvasiş k’elen 1922 3’anas St’amp’olis gamiçkvinu. Uk’ule Avrop’uri dobadonapes çkvadoçkva fara gamiçkvinu. 1959 3’anas Suriaşi K’amişliş mufti Molla Ahmed Zivingiş k’elen Arabuli mçire şerxi muşite jur cildite Şamis gamiçkvinu. Çkvadoçkva ç’araşi nushapeş ok’iasute xveneri am şerxoni gamaçkva ren divanişi amdğanerdğaşakis xveneri irişen ilmiuri gamaçkva.



                                                                                                                                                              TÜRKÇE