|
İMAM XAMZAT BEG
Dağistanişi majurani imami Xamzat Beg, 1789 3’anas Avaristanişi nanaoğa Hunzaxişi oput’e Hotsatis dibadu. Baba muşi, Avari xanepeşi veziri do Hotsatişi xani Aliskandi Begi rt’u. Nana muşi Fatimat, Hunzaxuri Avari xanepeşi sulaleşen rt’u. İmam Xamzat Begişi ağanmordoba ilmepeşi ogurute golaxtu. Dağistanişi çineri alimepeşen K’urani do hadisi k’ala Arabuli, Farsuli, feni, mantik’i, ast’ronomi dç. ilmepe iguru. Xamzat Begik ağani ilmepeşa manişa oxvamç’k’et’u do mamgurapepe muşik xususi inç’elt’es. Mara Xamzat Begik, ilmepeşi oguru k’ala fursat’i aqvat’uşi xarbişi sterapapeti inç’elt’u. K’arta ç’eşidi silaxişi oxmaru do 3xenişa gexunu steri talimepe iroras ikipt’u.
Xamzat Begişi aktivist’obak, xanepe k’onari xampapeti oşkurinapt’u. Ardğas cumadi muşik Xamzat Begis ucoxu do Gimrişa, İmam Gazi Muhammedişa oxtimu ak’vandu. Xamzat Begik razi iqu do namtini guronepe k’ala Gimrişa mendaxtu. Xamzat Begik mo3’onderet’u Dağistanişi maartani go3’oncğoneri İmam Gazi Muhammedi namut; noseri, vak’uri, çkineri do oceroni mağarğale k’oçi. Xamzat Beg, İmam Gazi Muhammedişi irişen k’ai naibepeşen arteri rt’u. Limapes dido nirgu. Gimrişi nodgitaşa vitoşi k’onari muridi muşi k’ala ak’atu namut İmam Gazi Muhammedi işehidinu do İmam Şamili p’at’işi yaraleri muçitu (1832). İmam Gazi Muhammedişi oşehidinuş k’ule İmam Şamiliti p’at’işi iyaralinuşi Dağistani mk’ule oras uimame doskidu. 3 Pukrik’a 1833 tarixis, Dağistaniş k’arta k’eleşen moxtimeri delegepeş k’elen Xamzat Beg imami goşi3xunu.
Dağistanişi majurani go3’oncğoneri İmam Xamzat Begis k’ap’et’i tabiet’i uğut’u. K’aidepe utavize ikipt’u mara Xamzat Begişi imamoba mk’ule oras naqonu. Am mk’ule oras didi gecginoba mogapu. Emuşi aktivist’obaşen do adalet’işen molişinet’uşi “Hazreti Omeri steri adaletoni do gurami k’oçi” itkvinet’u. Rusepeşi dido goşat’k’va3upes nodgitu do Dağistanisti nizami oxor3elu. İrişen beciti do tarixuri oğoda muşi ren, oş3’anurapeşen doni Dağistanişi şkaguris xe3alaşi mance do çodina 3’anapes Rusepeşi k’udeli Avaristanişi oxaneş mek’arbinu. 19 St’aroşina 1834 tarixis Avaristanişi xanepeş k’elenarepeş k’elen Hunzaxişi cames, cuma namazis işehidinu.
|
TÜRKÇE
