|
ARKABİŞİ JURXİNCİ
Jurxinci, Arkabişi oput’e Orç’işa 2,5 k’ilomet’re medranobas, P’ap’ilati do Suxuletişi ok’ogzas gondgin. Xincepes mteli morgvalaş xususoba uğunan do ar toloni kvaş noxvene renan. K’amiletişi do P’ot’ocuriş ğalepeşi ok’onç’eri sotis renan. Xincepeşen arteri K’amiletişi ğaliş jin, majurani P’ot’ocurişi ğaliş jin gondgineri ren. Xincepe k’atiuro namu 3’anas xveneri ren var içkinen mara 1850-oni 3’anapes ixvenuya itkven. Xincepe k’oçepeşi do skidinapeşi mek’axtimu şeni geik’iderenan. Mankana xincişen var mek’valen. K’avk’asiaşen askerepeşi moncğonus am xincepe ixmarinuya do k’auli ixvenen.
Xincepeşi ginz’enoba 35,5 met’re, mçirenoba 2,8 met’re ren. Xincepes ketabe var uğunan. K’vateri kvape kiri do 3elate şveri ren. Tudeni k’ismi mteli morgvala steri ixesap’eren do jur k’ele k’ornişi gamaqlant’ape nişkvineren. 3’oxleneri orapes m3ika otamiruş met’a 2003 3’anas Dixagzalepeşi Umumi Mudirobaş k’elen mç’ipaşaşi itamirinu do in3’uranu. Kvaşi duşemepe itamirinu, kvaşi k’upeştepe ixvenu. Rest’ore xveneri am xincepe, k’ap’et’i do nargoni ren edo gomorgva do soti muşite doloxeni do galeni t’urist’epeş k’elen irişen dido na goilen tarixuri noxvenepeşen arteri ren. Mara tarixuri xincepeş xolos elaçark’eri bet’oni xincepek do elaç’ap’eri binapek am tarixuri xincepeşi z’irapa ok’oxvups.
|
TÜRKÇE
