|
MAPU3XOLE MZESKU
Mzesku varna k’ara bak’ali (mamuli) do bresti bak’ali (daduli) (turdus merula), mzeskugilepe (turdidae) familiaşen uça bundğoni, xila do bobolapeş maç’k’ome k’vinçi ren. Avrop’a, Asia do olande Afrik’as gont’aleri ren do mskva xonari uğun. Germas, zenis, fundas do mt’k’as skidun. Çamişi mt’k’as va moixvaden. K’ik’ili muşite let’aşen ç’k’emi, munt’uri do bobolape gamimers do entepe imxors. Ç’it’a 3’i3’ilape do pen3’oti ç’k’omups. Didote ç’k’emepe imxors şeni ziyani meçapsya do ik’abulinen. Xor3i muşi şeni iqvilenan.
Msvalepe muşişi ginz’enoba 25 sant’imi k’onari ren. Mamuli mzeskupeşi k’ik’ili çxant’ura skit’a, bundğape muşi uça; dadulepeşi k’ik’ili mati, bundğape muşi k’aveşperi ren. Mzeskupek qinoras omjoroni do tenha sotxanepes gulunan. Bilasa 3xik’epunas çkar uz’iramu dğaş morgvalis impulenan. Mzesku dido oxoink’ans do manişa putxun. P’eci but’k’oni calepes monç’inora goloçkvapan. Ç’umandeli ordo oras gegineri sotxanapes gulunan. Mzeskupek tanoras do m3’k’uporas mağala xonarite qirapan. Mzeskupe gulut’anşi dido uxonare iqvenan mara aşkurinanşi mek’vateri xonari eşimernan. Tudendo k’oçi na oşkurinaps mç’ipe xonarite qirapan do eputxunan. Dido uxonare dodgitunan do oşkuroni xali mek’ilasya do çumernan do k’oçiş varna skidinaş oz’iruşakis 3xik’epeşi doloxe iktenan. Obğe dadulik dodgips do 3’anas jur fara skups. K’arta faras 5-6 markvali geskups. 13-14 dğa monç’va iqven. Jur dolononi motalepe obğeşen eputxunan. Obğeşen meleri motalepe çkar var inç’elnan. 3’aneri mamulepe uçvaşa var ak’atenan do qinora mutepeşi dixas goloçkumernan.
|
TÜRKÇE
