ÇODİNERİ ORAPE

Muç’o boçodini him orape
Muç’o içodu him ndğalepe?
Muç’o boçodini ik’u 3’anape?
M3ikani? M3ika doga3’onuyi?
Sumeçi do vit 3’ana
Mu it’urt’u k’ap’ula ek’ebi3’edasi
Him ndğalepe do 3’anape
Gomaşinasi nosişa meyebolam
K’aobape do p’eat’obape
Tutape do 3’anape
Oroperi do z’i3ineri ndğalepe
Gurişeri do bgarineri ndğalepe
K’ai do p’eat’i ndğalepe
3ada va doskudu mutu mutuşi
M3xulişi, oşkurişi, nez’işi, ntxirişi
Ezmocepeti eveluri steri va bz’iram
3ada va doskudu mutu mutuşi
Aşkva dobiçodi, domaçodu
Na memaçuşik’u miti va bunçoli
K’aoba mepçi oropa mepçi
Xizanoba va miğut’u miti va mepçi
Aşkva meçamuşi mutu va domiskudu
Domaçodu mutu va domiskudu
A oropa va maçodu va maçodasen
Ğormoti dido momçu va maçodinen
İri şeni dido miğun miti va bunçolam
Oropa va maçoden, va maçodinen
Va maçodasen, va maçodinasen
İri şeni komiğun, buşinaxam
K’aepe şeni, xizanepe şeni
Miti miti va bunçolam oropa şkimi
Tkvati 3’ulu ot’at’uşa didepe tkvani
Mo unçolart gurtit
Oropa do k’aoba mo unçilaramt
Dida do badi iyati dogaçiranen
Ha3’i na gurtaten
Uk’aşxe k’orobaten
Ar do ar k’orobaten

15.11.1996

 
© 2009 kolkhoba.org