T'AMT'RA Ehey, T’amt’ra xolo kodgir muç’o gola, Xolo şvanup zoğak na mogimers şuri; Goşagidgin cixaskani, doloxзeri, Didi giğun, muç’ot з’oxle, T’amt’ra guri. K’olxetişen okroş t’k’ebi nixiresşi, Maartani xeşa emdos meşabğuri; Skani ak’ras Turkiş gemi nadgituşi, Ma emoras majurani xeşa bğuri. Nadgites do eç’k’vadala moxtu çkini, Oxorepes, k’oçis nabğes muç’o mt’k’uri, Em dğa iqu, muşk’ule çki na yep’ç’k’odit, Skan murgvalis va doskidu K’olxiş turi. Komoxtes do çkin, but’k’uci kagep’t’k’oçes, Nobut’k’uce qavranepes diqu muri; Aз’i kopxert msvast’ik’eri kiristeri... Va gaxvenen xoş mutu do iqu muri. “Margalepeş oput’e” na gegoz’it’u, Ğarğalapt’i si Lazuri-Margaluri, Mapa çkini skan doxores molaxet’u, Do ikipt’u dulyape kimoluri. Kaniçodu em orape, xeşen mamt’es, Si var ogni mati akşen muk’o p’quri; Miş Margali, mişi Lazi, soren miti, Kogogabğu uça qvaroci do quri. Aз’i mu p’a, şurimşine, mu gişvela, Leksi p’ç’arup, aya miçkin xvala, guri, Leksi p’ç’arup, nena bğarup, nena psvarup, Em oraşen nanaş nena na viguri. Mara xolo, si giçkit’as şuriş kyona, Mişamidgin ma diзxiri mcve K’olxuri, Dogaç’iras - k’ama, liveriti ebzda, Cixaskanis mevoç’k’vida çkimi şuri. Dogaç’iras, xes bandara dokaçerik Kok’ovobğa mteli, mteli K’olxiş turi, Geç’k’apaşa aya leksi dovuk’itxa, Voxvenapa dulyape Gubazuri. Ehey, T’amt’ra xolo kodgir muç’o gola, Xolo şvanup ixik na megibars şuri; Çelamure çkar mitisti va moз’irapt, Didi giğun, domtumela giğun guri. 20.09.07 İngiri   © 2009 kolkhoba.org