ĞALİS KVAEPE DOLOZ'İN

Ğali ulun zoğaşa,
İşo nimers kvaepe,
Hem kvaepe çkin voret,
Lazepe, Margalepe.

P’k’itxam em ğali mi ren?
Do so nimers ti çkini?
Aз’i mteli dogiз’va,
Memiquci, içkini.

Ğali xark’iş nena ren,
Ğali xark’iş xaçka ren;
Ham var ognaşa cuma,
Çkvaşi qona xaçkare.

Oput’epe mevaşkvit,
Vidit didi noğaşa,
Andğa ğalis dolobz’it,
Ğali ulun zoğaşa.

Zoğas mundes ak’atas,
Çki na mimernan ğali,
Emindoras meç’k’odun,
Çkini nena-ğarğali.

Aз’i mendrati va ren,
Zoğap’icşa ğalişen,
Mu p’aten visimadat,
Çkini p’at’i xalişen.

Var na leba mavenan,
Ğalik ekşaa gextaşi,
Do Ğormotis mu vuз’vat,
Şurik p’icis yextaşi.

Zoğa mu ren giçkini?
Eti aз’i içkini,
Eya gondinapa ren,
Eya çodinapa ren!

03.05.06

 
© 2009 kolkhoba.org