AR LEKSİ DESTANİSTERİ Gale qini ren, mtups do ixi bars, Ma kodopxedi do leksi pç’arup, Si na moğodi dulyaşeni, Çkim simadapes gamagisvarup. Go3’os giçini Gimuaş tutas, Mara aya beciti va ren, Mtini ptkvik’o na beciti ondi, Çkimişeni ar cumaloba ren. T’u3a selami molak’ireri Maili mailis noqupt’u cuma, Edo di3’opxu ar cumalobak, Am cumaloba muç’oşi bzuma. Ma si svarape gak’vandeet’i, Si estexolo cğonupt’i aşo, Mati k’arta dğa vik’itxupt’i do Visimadept’i çkim Lazonaşo. Ar didi nç’ela miğut’u iro, Ma Lazepeşa oxtimu mint’u, Edo Ğormotik komemo3’k’edu! Maisis Mp’olişa ma vidamint’u. Do T’amt’ra noğas gepxedi putxas, Putxak zoğuças mejamiqonu, Edo duniaş nananoğaşa Didi Mp’olişa komomiqonu. Ma komoptişi dğa majuranis Telefonişa megin3’k’iali; Qoropat pşeri selami gi3’vi, Duşmanepeşa megi3’k’i qali. Edo manişa ok’oviz’irit, Doviğarğalit cumaleburot, Loqa do mskvami ptkvit ondepeşi, Ma çkimeburot, si skaneburot. Edo em dğaşen geiç’k’u mus na Coxons qoropa artikartişi; Çkin mzaxalepes xeleba mepçit, Dop’ç’vit, dopxalit guri mt’erişi. Ar t’abağişen giari p’ç’k’omit, Do ar k’vin3aşen pşvit dğaginz’aşi, Ar onciresti k’ap’ula dobdvit, Oxovo3’onit megabrobaşi. Edo visterit, vixelit dido, K’olxoba çkinis mxucepe mepçit, Laz do Margaliş artoba p’k’idit, Do am artobas muxuri gepçit. Ok’ule dğakti komoxtu olvaş, Mevaşkvamint’u ma Mp’oli, iri, Çki çodinoras viz’irit arçkva, Dopskidamint’u kogogak’iri. Mara skidala p’at’i ren ondi, Na ginonpeşa var ikips razi, Uk’univikti do komegaşkvi Em didi noğas k’ap’et’i Lazi. Uk’univikti, Samargaloşa, Komopti guri imendit pşeri, Komevaqoni did menceliten, K’olxur dulyas muç’oti mgeri. Aşo rt’u Xrist’ana var moxtuşakis, K’arari mepçi kart’ali p’ç’ara; Ar cumas mepça, em cumak si do, Aşo psvarupt’i, vizmont’i, mara.... Ma int’ernet’is komevuxedi, Ar mailepes gomn3’k’ip yado, Do ek maz’iru si na nç’arupt’i “Si muşi narği giğun yado”. Do dovik’itxi şilia fara, Komemodgitu uça dumani, A3’i mevagni ma mi p’qopere, Didi art’ist’i, megalomani. “Si gzapeskanis naqoni, idi, Çkva k’oçepe do sit’epe z’iri, Si çkimişeni megabre va re, Dovoçodini skank’ala iri”. Mu p’a, andğati var miçkin cuma, Si am nenape muşeni ç’ari; Guris daz’epe mot yegiçkindu, Do mot dostik’i but’k’ape jvari. Am leksi ren ne oxat’iruşi, Neti kufuri oğodamuşi; Gurişe moxtu do mati p’ç’ari, A3’i ma vore mance amuşi. Si eşo qvi na, si giçkin cuma, Çkin cumalobas t’alğape mat’u; Mara xoloti kogogaşiner, Na quraps soti z’iraşi k’at’u. Cuma, nenapes ak voçodinap, Ma var vişumi, sit var işuma; Na ginonpe qvi, mara xoloti Giçkit’as si ak giqonun cuma. 28 Xrist’ana 2006, Karti   © 2009 kolkhoba.org