XOPUREPES Xopurepe şeni doviqvi mt'k'uri, Mara, Xopas z'in xolo çkimi guri, Guri ek z’inşakis var yulun şuri, Xopurepes vubir xolo Lazuri. Mu p'a muç'o p'a, mişa medi p'a? Şur do guri, var gzirae-i Xopa? Xopas ne dixa miğun, ne ğoberi, Ne oxori, ne tis momatven ç'eri, Govulur ma deli devrişi steri, So gemom3'k'upas, votanap ek seri! Mu bğoda mali, pskidur xalali, Ginon k'oçi mşinit ginon abdali. Nana çkimik ek mibiru on3'elis, E ç'alimi let’as gyacintu belis, E oxoris kva ejobdvit temelis, Xopurepes aya uçkinan mtelis. Mu p'a muç'o p'a, mişa medi p'a? Şur do guri, var gzirae i Xopa? Ma Lazepe şeni didope m3'iri, Mu na vort'i, kovore, var viktiri, Derdi var doskidu ma na var bz'iri, Xvala dudis var yemixtu inç'iri. Eti yextasen, k'ata mixtasen, Let'a çkimişenti k'van3a iqvasen. İri Xopurik var mşinaps noseri, Bazik mşinaps m3ika elapatxeri, Aşo miğun ma igbali gokteri, Okroti xe çkimis nikten noşkeri. Mitis var uçkin, mati var miçkin, Mo pskidur ma, umuteli dixaş jin. Dobğuraşi, birapa doskidasen, Çkimiş k'ule coxo çkimi skidasen, Kimi Xopurik guris memiç'vasen, Kimi kança, kimik deli mşinasen. Ne miğun bedi, ne mitiş medi, Xopas z'inşa guri çkimişi gverdi. Ma ne kança, neti deli var vore, Ne umuteloba pşinap oncğore, Halali luk’maş mamç’k’omale vore, Ne kyole vokaçap, ne kyole vore! Ma aşo vore do 3’ori vore, Var vimxor, var miç’k’omapun oncğore! Kamoşalaşi pen3’k’aşen ç’uburi, İmxonan, va ren na eya punt’uri, Gombundğolu, gemat’u 3aşen kuri, Mati var vicer, vort’i-i Xopuri. Mtel var gondunun, mtel var ijolen, Nok’uçxenepe çkimi Xopas koren. Mu na miğun, iri k’oçepeşi ren, Çkar mutuşa skani-çkimi var matkven, Ne na renşa mitis mutu manz’inen, Ne na renşen mutu gegak’ordinen. E na ren koren, xoloti t’asen, Çkimiş k’ulenepekti ixmarasen. T’anis t’u3a miğunanşa di3xiri, Kiana vixmart muç’o musafiri, Ç’umen dudis kemixtanşi inç’iri, Skani-çkimi dixas geskidun iri. Mutu var gağen, m3’ule ren let’a, Çkar mutu var ganç’en tabutiş met’a! Dro moxtasen var iqvasen dixati, Var doskidun k’oçişi noxvenepeti, Mara kianas mutu var gyok’ordun, Muru3xepek varvalasen xoloti. T’u uçkineli, t’asen xoloti, Amus ne skan gik’atun, ne Ğormoti! Tangri na yoçkinu ren na k’oçi ren K’oçiş nosişen Tangri didi va ren Muşi yenoçkinuşa muk kyole ren Na yojilasenti xolo k’oçi ren Nosi nosi ren, uçodinu ren Eya ne yiç’open neti gamiçen K’oçişi noçkine k’oçepeşi ren, Eya ne nixiren, neti impulen, Skidalaşen ekole mutu va ren, Ren na, xvala veresia medi ren! Aya aşo ren, iri 3’ori ren, Em dunyaşen na moxtu mi3’vi, mi ren? Noç’arepe çkimiti çkimi va ren K’oçi vore, eyati k’oçişi ren Ç’ume ma çkva Lazuri var mabiren Ne na ibiranpeşen masiminen Çkva mutu va ren, iri diçoden, Ğuraş ekole skidala va ren! Namus p’k’itxat, namu voret noseri? Kiana dodgineri ren gokteri, Didope nciris ret seri-ndğaleri, Gopucapan, skidut pucepe steri. Mo iqver puci, ma memiquci! Elegibirpes 3’ori momçi quci! Mis eya cennetepe na gikades Mo usimin molla, xaci, xocapes Aşuğiş sazi var miğun tina xes 3’ori nena vubir p’ant’a Lazepes Skidi xalali, mo re abdali Nciriş ora va ren, goipa3xali Unosepe şeni qoropa va ren Noserepes k’itxit, qoropa mu ren K’oçi, k’oçi na 3’ipxupsti nosi ren K’oçis na var qorops muk k’oçi va ren Giçkit’an iris, koret na t’vinis Qoropa nomskun xvala k’oçi skiris Dolokunuten k’oçi var i3aden K’oçiş nosi ren k’oçi na a3aden 3adup na si k’oçi 3adi nositen Nosiş gale k’oçinoba var iqven Na gibir steri, iri noseri Do, mo iqver dixas bedi goç’veri Noserişa var golilaps dubara P’ant’a noserik dogidgips kandara Mo giğut’as cebes k’ap’ik’i para Xvala mo rt’a nosişen si fuk’ara Mo rt’a bunduri, şvanupşa şuri Unose k’oçi ren, k’oçepeş mt’k’uri İri kimolis şarvali moz’inan Mara gverdi, k’oçiş maymuni Renan 3’ori k’oçis irek’epe dodgipan İrek’i mutepeşiten ç’opupan Var masincenan, var ma3xunenan İri şarvaloni k’oçi miçkinan K’urbeti ma var pşinap a Tbilisi, Vore tina ma babaşen muflisi, Skidalaşen ma na manç’enpe ebzdi, Ma am dunyas em dunyaş derdi var bzdi! Ma 3’ori vore, kança var vore, Oş3’anura çkimişi skiri vore! Kianas ma pskidur kimoleburi Çkvaş meşveluten var mişvanun şuri Helimiş Xasani vore Xopuri Mtel Lazepes e na vubir Lazuri Pşvanupşa şuri, vibir Lazuri Vibirşakis var domidgitun şuri. Tbilisi, 1970   © 2006 kolkhoba.org