KVAOMXAZE E Kvaomxaze mota ibadi Miçinare-i hele mo3’k’edi Ğomaneri bere dovicumadi Mcveşi yeris kodgir e Kvaomxaze Si kvaşi re do var giğun derdi Mara ma doviqvi k’oçişi gverdi Miğut’u ala didopes medi Var maxvenes mutu e Kvaomxaze Xolo zoğak ngcaxups tutaste seris Kodgir do p’ant’a si mcveşi yeris Zoğaş yanis go3’k’er do k’ata seris Var iktire si e Kvaomxaze Bazi dogaşumen do zoğak ngcaxups Qinvas ixepek ak’o na kşatxups Sert’i k’alaşik si na gogpatxups Mota ibader e Kvaomxaze Guri çkimiti muk’oti t’axan Xapisis, k’aset’is muk’oti ç’qip’an Sibiriş qinepes muk’oti şatxan Var iktiren ekti e Kvaomxaze Mç’ita 3’alonaşen mç’ita na moxtu Leniniş noğas eya na goxtu Var gondunu soti xolo komoxtu Do, xolo si gibirs e Kvaomxaze Sarpi, 1956   © 2006 kolkhoba.org