ONÇAMURE Ar ç’uç’ut’a memingap siti ma, onçamure, Jur k’uçxonepe steri si şuroni çkamu re Si gcaxups p’ant’a dingik do çkva şeni incaxer, Var gelagişvels mitik, dingi k’ala ibaxer. M3udişi ibaxert tkvan xark’işi brinci şeni, Var miçkin mu ganç’enan do ibaxert çkva şeni. He brinci skani iqven, si xvala nçxvarumt’aşa, Dinçxvaraşi, çkva nimt’en ç’uvalepeten çkvaşa. Ne na gejodgin dingis k’ulanişi ren eya, Neti na xaçku dadis a3’i aç’k’omen eya, Çkva hemuşi pilavi ağa do begis anç’en, Dadi çkimis mendrale xvala p’ici a3’k’aren. Dopstiburt’i, mis uçkin, vort’ik’on na mat kvaşi, Mu na ren, mus uçkin dingis, xveneri ncaşi! Si kvaş xveneri re na, nuxondi dingiş bigas, A3’iti nciris re na, dişkaşi re, giçkit’as! Mak’riali, 1932   © 2006 kolkhoba.org