Ç'UT'A KARMAT'E Skurepe oşenaps sersi muşite Mcveş emektari ç’ut’a karmat’e, Txomuş ğurni do txomuş sp’inate İkten udodginu ç’ut’a karmat’e. Ne seri dodgitun, neti dğaleri, Nak’o oput’aris na umkups mkveri, Mitik var z’irops ar doç’k’inderi Çkini m3’k’upi skuris ç’ut’a karmat’e. Entepe skani madulyepe t’es Entepe t’es si na bina dogidges Skani k’ala nak’o seri otanes Madulyeş manebra ç’ut’a karmat’e Nak’o içinobup kale k’ulani K’uçxe ç’k’vaderi, xe nasironi Varna nak’o xçini toma k’inoni Dotkvi hele ar ç’ut’a karmat’e Entepe k’ala re seri dğaleri Siti mazaxmet’e entepe steri Nak’os mani-mani umkvi do mkveri Oçkvi oxorişa ç’ut’a karmat’e Tkvi!... Çkar giz’irun-i ağaş k’ulani Mağala kuroni p’ap’u3’epete Na megodgitu eşo ç’umani Kokşuns na dotkvi ç’ut’a karmat’e Var kşuns, komikçin m3udi gik’itxi Ma skani tarixi dido vik’itxi Var vicer-i xolo siti mogk’itxi Dobstibi do var tkvi ç’ut’a karmat’e Çkin juristi derdi mtel ar miğunan Noxvenepe çkini çkin var manç’enan Çkin viçalişept çkvapek imxornan Antepe momç’unan ç’ut’a karmat’e Çkva şeni aşo mundeşa ikter Miş noxvene mişi coxote ikter Çkva şeni eypşer, çkva şeni moyçoder, Si mutu var ganç’en, ç’ut’a karmat’e. Siti var giçkin mu gcoxons mi re Siti çkimi steri gondineri re Ma gopk’u3xur siti bunduri mo re Çkini şeni viktat ç’ut’a karmat’e Xopa, 1932   © 2006 kolkhoba.org