MUÇ'O P'A DO SO BİDA? Maryaşina mulun, sifteriş ora, Va mp’oromi, kale bozo gozgora? Va mp’orom na, dotkvi, başka dobgora! Muç’o p’a do so bida, e verane? Avli skani golobit’işi ğoma, Yalis o3’k’ert’i do i3xont’i toma, Na idare yeris mot extas nk’oma! Muç’o p’a do so bida, e verane? Si mot doloxet’i ont’uleş rubas? Gebareli mu dologiz’in ubas? Gomdunare, dolobantxare t’obas! Muç’o p’a do so bida, e verane? Dido ç’ut’a giğun si, gyuli yaşi, Si mundes mavare ma arkadaşi? Jur tolis domaben ma iyya yaşi, Muç’o p’a do so bida, e verane? Ar destani p’ç’ari mteli Lazuri, Ma mutu var matkven, omapşu guri, Trangi çkimi, kemiç’opi ha şuri! Muç’o p’a do so bida, e verane? Genci 3’anas iri komemaç’aru, Razi bore, Trangik na memiç’aru, Derdi çkimi k’alemis var aç’aru, Muç’o p’a do so bida, e verane? Na gelemimet’i kçaneri txiri, Çuruğayis komemotvesi tviri? Ha3’i bgara gyoç’k’i, çelambre mğiri! Muç’o p’a do so bida, e verane? Camikanis ak’oşka ek’vateri, Var gi3’ume coxo gamak’vateri, Mu gobulut muradi mok’vateri! Muç’o p’a do so bida, e verane?   © 2009 kolkhoba.org