SEVDALOBA Sevdalobas geyiç’k’en oropaten, Sermaye var unon, sade guriten. Şa iveni ham dulya çkar zoriten? Si domç’vi do domxali gyuli çkimi! Ar destani giç’arare bgaraten, Ma nak’o goptare guri yaraten? Dobğura na, var biz’ire paraten. Si domç’vi do domxali gyuli çkimi! Nak’o ndğa ren, var maz’iri si, gyuli! Mok’omotun avli skanişi m3xuli, Var memaçu, xes koxomskidu gyuli. Si domç’vi do domxali gyuli çkimi! Bayramiş dğas noğaş gzas komemagi, Skan ustune goxtimus kogebagi, Nik’idare, ma kogegidgi ragi. Si domç’vi do domxali gyuli çkimi! P’anda bibgar penceres ek’ideri, Giç’arare destanepe k’ideri, Gogoçkvare altuni gok’ideri. Si domç’vi do domxali gyuli çkimi! Trangi hakimi ren çkimi dulyaşi, “Hayde” gi3’vaşk’ule zop’on yavaşi, İris nuucam do gyuli, goyşaşi. Si domç’vi do domxali gyuli çkimi!   © 2009 kolkhoba.org