MAİA MARGALİNA

Vitoşi-çxorooşi-otxoneçdovitoni 3’anapes

Auuuuhiihiihiihiiii!...
Şurgamaxirxineri
Ar nena, ar “xunari”
Lazuri-Margaluri
Meleni do moleni
Dixape çkineburi
Artikartişa k’veri
Dixalu juri guri
Ek’nape koguin3’k’u
Dixelu juri guri
Auuuuhiihiihiihiiii!...

E do;
Em dro
Kok’ovagit emu k’ala
Mun ort’u p’ea/
Ar ok’oxtima-i, a?!
Ho, ho!...
Margalina Maia

Gononk’ele juroni
Juroni ar guroni
Tolepes ora dğuleri
Memant’alu dğaleri
Tuta maçkinu ma, ia
Ho, ho!...
Margalina Maia

Purkep opşun-opunt’es;
Golas, gomtes, oput’es…
Skani k’ala va bz’irit-i?
Mskvanoba muz’in iri-ti
Giuli, susani, ia…
Do “leri-k’olxumia”
Ho, ho!...
Margalina Maia

K’olxepuna svape, didi
Qoropaşa mskvape, dada
Nandid, dadi, da, dida
Ma mu p’a do so vida
“-Voooi Ğoronti voiii” ya
“-Tis menok’are ho-i?” ya…
Ho, ho!...
Margalina Maia

Tkvu: “-Muk’e miçkini ret?”
Ma btkvi: “-Tkva-ti, çkini ret,
Çkini ret, 3ira çkini
Gur-k’era megiçkini”
“-Ma skanda, si çkimda-i?” ya.
Ho, ho!...
Margalina Maia

Çku nanapeş mengapa/
Çku ninapeş megnapa…
Am din3xirik ezdips-dozdips
Ok’oqoner qoropa zdips
Btkvi: “Arti ren taso, peso”
Tkvu: “Çku; da do cima-i?” ya
Ho, ho!...
Margalina Maia

Onk’elupe goim3’kidu
Muk’o, mupe moi3’ondu
“-Gur dolovikaçi” ya
“-Zuğa, mosas kapçia,
Txiri, lazut, çai” ya.
Ho, ho!...
Margalina Maia

Purkepe tito xepes
Çilamrepe tolepes
3’ordun xeleba ea
Mu dolangonu p’ea?
Otkvute var içkinen…
“-İrto skvami… k’ai…” ya
Ho, ho!...
Margalina Maia

“-Nana / nina artirot!”
Nananena va viktirupt
Çkun çkvanoba va btirupt
Uçodine dobskidat
Do artobate bskidat
“Çkunebura ho-i?” ya
Ho, ho!...
Margalina Maia

 
© 2009 kolkhoba.org