KADA U3’u arte çkinis badik: “Kada vat’i Do ç’umanis op’ç’k’omat’i”. Kçinik ordo ezdu mkveri, Topur 3’k’ari gon3’k’imeri, Dovu n3omi nostoneri, Ngrestas moşkva dusu mgvana, Dişka dido t’u hem 3’anas, K’ay doç’k’vinu, domç’itanu, N3omiş murgi go3’int’anu, Xepe gusu do domskvanu, Ngrestas gedu do komotu. Badik ini mç’k’ud ipxort’u. Arçkva kçinik ezdu, mo3’k’u, Z’iroms: kada diç’u, dom3xu, Muç’o mskva bozoşi lok’a. Kçinik murgi xeten 3’onums, Badik şuri şvanums monk’a Do kerenç’i muş 3’u3’onums. Kçinik xolo dusu mgvana, Jinşen komoyobğu mkveri, Komoyobu kçeş topuri. Kada heşo vore, vana Muç’o iven nostoneri?! Badis mtel dolulu şuri Do ombaxus gyuç’k’u gurik, Kçinik xolo ar saat’is Şur yumet’u muşi badis. Kada koyodu pencires, Komeşaxtes do dincires. Va gamaxtuşak tanuri Bad koyuk’ap’u z’enuri, Pencireşen ngrestas nat’u, Hekol nat’u, hakol nat’u, Kada va çkint’u, sot var t’u. Badik kogyoç’k’u uroi, Giçkin, oşvapes ncumoi, Melu, k’uçxe ğocis geçu Do Ğormotis şur komeçu. Kçinik heya koz’iruşi, Guris naç’u badi muşi, Porça muşi bri3’u-bra3’u Do şkurnaten gur ut’k’va3u. Dogibağes, çkva va mçodun, Meseliti domaçodu. Ha3’i irik dop’at nani, Moboşvacinaten t’anis! Kada gegidvat ç’umanis, Ha3’i nani do hanani!   © 2008 kolkhoba.org