LAZİSTANİŞİ DESTANİ Minon kart’ali ebzda do na bz’iripe dop’ç’ara. Ma zit’a k’oçi va bore, guris memodgin bgara, Na bzop’onpe oxo3’onit, çodinaşakis psvara, Çilambre nak’o emanç’as, hek’onari bibgara. Svara çkimis çkvaşi nena var nati, mobivarat Do T’amt’ras mupe naç’aru, irxolo dogiç’arat. Geboç’k’a xolo birapa mcveşuri Do ha monk’anobas muşletun şuri. Bgarini memodgin, opşa ren guri. İri, mu bogni do bz’iri, gi3’vaten, Kemanç’u na çkuni nena Lazuri. Dopxedi do bzop’on iri na m3’ori. Ha ç’ut’a skidalas na memaç’aru. Ma mcoxons xe-k’ot’e, bore Vi3’ori. Ognat şk’ule mo gemiç’k’amt obgaru. Mu na iç’aren, ir va iven mtini, Met’i na t’u m3udi ren do ğerdini. Ma bibira, si ark’el miç’andini, Doptkvat na bognitpe mtini-vamtini! Jur cuma t’es ar baba do nanaşen, Dolibaxes ar m3udişi nenaşen, Va dodgites, imt’esdort’un T’amt’raşen, Xol kok’ages, komoxtesşi mendraşen. Ar doyneri ar nanaşi berepe İbaxet’es, doloşires xamepe, Di3xiriten domç’itanes ğalepe, Lazepunas komunz’ines derdepe. Nana-babas, mu vat’es va uçkit’es, Koxo3’ones: p’at’i ves, na yoçkines, Ç’ut’aşendon çona muşen nuçkines! İbgart’es do mu vat’es, va uçkit’es. Eçi 3’ana golilu muç’o mutu, Eçi 3’anas dido mç’imu, dido mtu, Lazi k’oçik Lazepuna komoktu. Kianati iç’imoşu do iktu. Bibinetis 3ani çkar va doskidu. Sinap’işen P’oli z’iru, hek idu, Pen3’omç’k’omuk T’amt’rasti t’at’ komudu, Haşope memaç’ares, haşo ç’arel t’u. Va uçkit’es Lazuri guriş ç’vini, K’amap lasiromt’es, goç’k’ondes xini, Juristi uğut’es gurepe ini. Jur cuma t’es, juriti xol guruni. Ari na t’u kusre P’arsis ke3’arçu, Majurati Romarepes kodarçu. Lazepuna ipaluru do iç’u, Ğormotikti heya guris va niç’u. 3’anape xval va dodgites, nulut’es, Lazistanis çkva mgerepe gulut’es, Lazepeti mç’acepester ğurut’es, Ğalepeti daçxuriten skurut’es, Ser-ndğaleri Urumepe mulut’es, Dixa çkunis mapapester gulut’es, Çkun xamiten ç’ut’a-ç’ut’a ğurut’es, Do xoloti va goyktes, va nulut’es, Ğurut’es do çkun let’as amulut’es. Cumalepes va uğut’es oropa, Doğurines, eşaç’k’ides Lazoba, Gombundğoles, çkva muç’o bik’orobat? Mu ivet’u, noşkidat’es berobas! Uxvene t’uş, k’o hemus moç’k’odat’u, Varna şuri na dgit’u, noç’k’odat’u! Berepeşi hulyape va k’odat’u, Çkva mitişi bere ezda dordat’u! K’ina-tok’i kogemidves alepes, Na var amtxu kodolobğes ğalepes. Didopeti konok’ides ncalepes, Va iç’aren, na naç’ares Lazepes! Çkun cixapes çkvaş Ğormoti pxvamumt’it, Svara çkuni çkvaş nenaten psvarumt’it, Oç’aruti çkvaş nenaten p’ç’arumt’it, Do haşoten monk’a-monk’a pşvanumt’it. 3’anağanis 3’anağani noomt’u, Çkva gzalepe çkarikti va gorumt’u, Oncğoreti çkar mitik va n3’orumt’u, Ç’ut’a nenas didi xena moomt’u. Lazistani ok’ot’k’oçes, met’k’oçes, T’amt’ra guri Romarepes nut’k’oçes, Hemtepekti tok’i mk’ule mut’k’oçes, Do Lazepe Lazonaşen get’k’oçes. Hak’o uça ç’ara çkuni iç’aru, Lazistanis haşope konaç’aru, Hemuşk’ule bedi va dolaç’aru, Mitiksanis hemuşk’ule var ç’arun. Kogoç’k’ondes na iğanen pi3ari, Ok’oç’k’ides cumalobaş ba3’ari, Oncğore komeçes ğalişi 3’k’aris, Ha3’i ginon iz’i3ini, ibgari! 3’anape nulunan miti va çuman, Kort’ui, var t’ui haşo jur cuma, Mitis va uçkin, moilu purçuma, Haşope zop’onan, gurep miç’uman.   © 2008 kolkhoba.org