ÇKİM OROPERİ Lumci komoxtu, kogeylu mjora, Si mot va mulu? Beki majura Mitis orom do tkvam skanebura: “Namus baona, namu ren k’ai?” Ma dogi3’va, çkimi tuta lumconi, Bira re si xvala çkim obironi, Mskveri re si, xvala çkimi oyloni, Moxti, ma kçume, çkim oroperi! Soti va gz’iri, so gori ndğaleri, Ha3’i so gora, so gz’ira si seri? P’oli do Tunas va ren skani steri, Moxti, ma kçume, çkim oroperi! Şetxi kogeçu na gepxe tipepes, Ma va mebugam irxolo biç’epes, Ğura buğare ma skan cumalepes Çkvaşa sot komekçes na, oroperi! 3xeni mionun, ixis naç’işen, T’ufeği çkimi k’ay ren irişen, Xe çkimisti dido k’ay açalişen, Pskidaten çku dido k’ay, oroperi! K’et’i met’roxu, bz’irom, si mulu, Mat kebiseli, skandek’el bulu, Ha3’i skank’ala nçamis gobulu, Dunyas, oroperi, si xvala k’orom! Ç’ut’a re si, vit’otoxo 3’aneri, Kxvelumt’aşi, mi3’ume bgarineri: “Mo memtxim xe, oroper çkim, ham seri, Vana ç’umani mz’irare ileri!” Si na mibri3’iş yileği t’okseri, Nanak nenape mi3’u ma hasteri: “Mi k’ala si, mişi bozo, isteri? Mi k’ala gulu, anderi, ser-seri?” Si va gaşkuynas, iris ma coğabi Komepçam, dop’3’omxum iri kebabi! Lazoğli bore, Vi3’ori mik’vabi, Mot gaşkurnet’as, oroper çkimi!   © 2008 kolkhoba.org