LAZONA Zoğap’icis golacans T’amt’raşen Soxumişa, Mesvaeli mindilen Oçamçire Potişa, Sarpişen Mak’riali, Azlağaşen Xopaşa, Arkabi, Art’aşeni, Vi3’e do Atinaşa. Ncaepe mui3’ipxen pukiroba moxtaşi, Skindinape muisels dixaş şura goxtaşi, Xeleba do k’aoba çkar eksiği vaaqven, Parpali do but’k’uci pukiris noxedaşi. Namuk’udgin germapek mç’ima vamek’oçkumers, Nagonvalas do xon3uk dido nenape tkumers, Mç’imaş k’ule mjoraten t’aroni gontanaşi, Dixaş tude ç’k’emepek tiepe kamuşimers. Meyvape kamuinç’en mapxas mjora yextaşi, Zoğas nadven do iç’ven limcişi gyant’onaşi, Ç’anda stei şenluği dixvenen k’arta svapes, Lazepe k’urbetişen Lazonaşa moxtaşi. Oncere stei nirçen ont’ulepes tipepe, Kvanç’ala stei irden k’ulanepe, biç’epe, Mjoli, m3xuli, qomuri mteli dixas kodibğen, Golapes koguşibğen kotume do pucepe. Stveli moxtaşi ncapek mteli but’k’a kodobğaps, Germapes skindinapek oç’k’omale kok’obğaps, Dulyape koniçoden bireli noderiten, Mteli şei mskva uğun, muç’o cennetis mengaps. K’alaşi kelabarups staroşina moxtaşi, But’k’a let’as komatven ncapeşen kodibğaşi, Oşvale oç’k’male mutuş derdi vaizden, Ont’ulepes luqu do zoğas çxomi kort’aşi. Qinobaşi tutapes dido didi mtups mtviri, Odapes kaelobğun k’ak’ali k’ala mtxiri, Kyume k’ala lazut’iş ntxozerepe xaziri, Çkar şkurina vaizden xaros yopşa ren mkiri. M3xuli do qurz’enişi keladgin p’ek’mezepe, Ç’uk’iten k’avurmape cumoneri çxomepe, Axiris kelosvarun dişkape do 3xik’epe, Tipi nçalaş noxveni n3aşa yulun bardepe. Emtumanepes gedgin qonape do mtxirona, Kianas vaiz’iren aşo mskva dobadona, Zoğa k’ala mjoraten, muru3xi do tutaten, Mskva seri ndğaleriten p’ot’es kort’a Lazona. 03.06.1994   © 2006 kolkhoba.org