MJORA

Ar seri çkva diçoden tuta gzas kogedgitun,
Muru3xepe kodibğen mjora kogoladgitun.
Tutak boxça muşiten mindulun kagondunun,
Mamuli do izaniş sersi kodolodgitun.

Mjora ç’it’a kextaşi nek’napes konodgitun,
Mara guri muxtaşi mp’ulas komuk’udgitun.
Golapes gomjoraşi z’abunoba vamalen,
Ondğeri komoxtaşi iri svas kogyodgitun.

Dixa n3a doxominaps doç’ups ar dişumaşi,
Dont’k’obun kagondunun ar mç’ima komoxtaşi.
Mç’ima k’ai şei ren eti igoren mara,
Xeleba kogedgitun t’aroni gontanaşi.

Ont’ulepe ixaçken oxorepe ik’iden,
Bak’i bağu bargeni oxoris guik’iden.
Dulyape var içoden mara mjora ulun do,
Pangaraş t’epsi steri iya kogu3’ik’iden.

Mjora var gyant’onaşa xolo tuta komulun,
N3aşi k’arta t’arafis muru3xi kagamulun.
Ar ndğa çkva koniçoden mjorak tutas ducoxops,
Ar selami gyunçaxups xe gyuvalups mindulun.

08.02.1995

 
© 2006 kolkhoba.org