MÇ'İMA 3’oxle ar mp’ula moxtu rak’anis konodgitu, Dirdu do dimçxvanuşi mjoras kogu3’udgitu. Ar ixi kamoşaxtu mp’ulape kogoşobğu, Ok’ule guşikaçu germapes komodgitu. İxi mendaxtuşk’ule mç’ima gzas kogedgitu, Limci naiqvas steri m3’k’upi kodolodgitu. Oşiraluş sersiten ar-jur 3’ap’a kamelu, Skindinape keşkurdes skidala kododgitu. Goşaşeri gunk’apes pucepe do genepe, K’ark’ales do yeputxes oput’es kotumepe. Oxorca bere-bari ont’ules koguşibğes, Bargenis komolobğes nçalape do tipepe. Nagedginan ncaepe ixiten guink’anu, 3’ap’apes komanz’inu ar k’eleti dimçxvanu. Mç’ima k’ala ixişi sersepe kuxuiktu, Xon3u nagont’k’va3u do kyoyi kuxuink’anu. N3a nagedgin 3’alami met’ruxu kago3’astu, Nago3’obun mp’ula do mteli mç’ima kagextu. Şuroni uşuroni mç’imak doçxu dobonu, Germaşk’ele şvariten kva do nca kagelaxtu. Dido ora mik’ilu xolo mjora kayextu, Mp’ulak ti kamondrik’u mç’ima k’ala mendaxtu. Şkurina kagondunu xeleba kamoşaxtu, T’aroni kagontanu ağani ndğa komoxtu 08.03.1995   © 2006 kolkhoba.org