K'OLXETİŞİ DESTANİ Ğormotik mcveşi oras ar kiana kododgu. Dixaş oparuşeni k’oçepes koducoxu. İri xolo unk’ap’es Ğormotis kogvabğesşi, Dixape dupau do entepes kogu3’udu. Mundeşk’ule K’olxepe Ğormotişa komextes. “Dixa kagomoç’k’ondes, affi domp’it” ya u3’ves Dido pşvit do visterit, viz’i3it do pxoronit. Dido oncğori aqves, edo emus oxre3’es. Çkinti dixa minonan, 3’oxle zoğa uğut’as. Ğalepeti guşilas, germapeti gudgit’as. Ar k’ele viçalişat, ark’eleti ğvini pşvat. Bağepeşi oşkenas, qurz’enepe gyudgit’as. Ğormotis en mskva dixa şinaxeri uğut’u. K’oçepe mo3’onduşi muşiğu do komeçu. Amus k’ai o3’k’edit, ğvini şvit do xoronit Manti gomişinit do birtum mxvamit ya u3’u. ‘Didi mardoba’ u3’ves guiktes entepeti. Aç’ara, Samegrelo, Tbilisi, İmereti, Ç’aneti, Svanetiten kok’oxtes mtel milleti. Muç’o cennetiş kyoşe, coxo gyodves ‘K’olxeti.’ Ark’ele Zoğauça, ark’elendo Turketi. Ark’ele Ruseti, mukti muç’o ziyneti. İrik’ele kogobğun ek naskidun milleti K’afk’asiş germa mudgin, k’ap’ulaşi k’eleti. N3aş perişi toliten, okro steri tomaten, Ç’k’oni, m3’ipuri steri ginz’e-ginz’e t’aniten. P’ot’es vargaşkurinan, Avrupaşen Asyaşen Kvanç’ala steri kort’at, k’ap’et’i menceliten, K’ulaniten-biç’iten, badi k’ala xçiniten, Birtum kort’at K’olxetis, xoroni-z’i3initen, Ğormotişen xvameri, skidalas xeleberi, Ndğalepe mek’agilan, ç’andaten, bayramiten. 20.09.2005   © 2006 kolkhoba.org