ZOĞAUÇA Lazonaşi k’un3’uli Sarpiş k’ule Abxazya, Megrelepeş ekole K’irimi do Uk’rayna. Moldova guliktaşi komegargen Romanya, Jilendo amot amot gulilap Zoğauça. Jur xoli dixa uğun mutu varen Bulgarya, Skanda vananç’işinen Yunaniş p’alik’arya. Mp’olişa vamoxtaşa ar mcixi dixa Trakya, Tunaş 3’k’arik golebaps sin birtum Zoğauça. Mp’oliş xurxis mik’ilap Marmaraşa mindulu, Zongolis xe gyuvalup Sinopişa konulu. Samsoni Giresuni Orduşenti gululu, T’amt’ra şk’ule Lazona kogyoç’k’aps Zoğauça. Zoğap’icis nacundep kvanç’alape k’oro3xup, Mjoraten xura ibon let’a imxor mç’ima şup. Ti skani jin gokaçun sin çkar mitis vanoqup, Ak’o ti mo3’onei mis mengap Zoğauça. Tude skani ağani ar dunya dologidgin, Mjora k’ala tuta do mp’ulape tis mogidgin. T’alğa oxvenu şeni ixiti komegidgin, Dido ordo işume mu gomç’un Zoğauça. Mskva t’aronis konirçe at’lasişi k’umaşi, Dido k’ai megomskun tuta maroşinaşi. Mu z’irana dostikup ar ç’it’a dişumaşi, Naoşkvida k’oçepe mu ikip Zoğauça. Kiana didguşk’ule ixelap do işume, İxik megibaraşi tiepe kamuşime. Naşinaxup mutupe muşeni vamuşime, Si vart’ana Lazepe keç’k’odun Zoğauça. Si nagiğun kapçiya okyanusis vauğun, Çxomiş şilya ç’eşidi si tude dologibğun. Feluk’a k’aravepe jini skani gegibğun, Lazepes şuri guri si miğut Zoğauça. 01.02.1996   © 2006 kolkhoba.org