XATUNAŞİ DESTANİ
Vuyi dadi mu mskva bozo giqonun.
Xes gyak’nep do si eşo gogiqonun.
Emuş met’i ma miti var miqonun.
Umiteli so vida dadi çkimi.
Ma Xatunas dovuç’ari destani.
Vaqoropi emus dovak’iskani.
Ma komomçi mu iqven bozo skani.
Soti var ya var dotkva dadi çkimi.
Bozo skanis ma p’ot’es toli miğun.
Mali mulki mu unonna komiğun.
Ma3’k’indi kevuç’opi cebes gomiğun.
Aşo sica so z’irop dadi çkimi.
Mot mimpulup mskvaela bozo skani.
Razi diqvi yegiç’opup tik’ani.
Astaxolo dovuxvenup nişani.
Si damtere domaqve dadi çkimi.
Bozo skani ma muşeni gomamt’en.
Oncğoriten nena muşi dolvamt’en.
Xes gevak’nep go3’amistun do mamt’en.
Ar jur nena kelotkvi dadi çkimi.
Xatunaşi tolepe zoğa stei.
Ma ar miti var bz’iri emustei.
Dişka iç’ven doskidun xvala mt’vei.
Komemadu doviç’vi dadi çkimi.
Ma but’k’uci iya pukiri stei.
Umsvaeli ar melaeği stei.
Xe mentxaşi dontkirun gyuli stei.
Nosis vulu movulu dadi çkimi.
Xatuna met’ak’siş tomaten gulun.
Muç’o pukirobas pukiri yulun.
Ma mz’iraşi gomakten do mindulun.
Si am bozo so z’iri dadi çkimi.
Vuyi dadi ma mundeşa vimgara.
Guri çkimis komemiz’in pangara.
Bozo skanis mundeşa mevamgara.
Si mundeşa goxre3’a dadi çkimi.
22.12.1994
| 