EY GİDİ NOSİ

Çkina oxori renna nosi emuş nek’na ren.
Suparati em nek’na nagon3’k’ips ar nk’ila ren.

Emuş ok’idu şeni p’lani p’roje unonna,
Nosi muendisi do em p’rojeş mimari ren.

Nosi ren irişeni iya k’ai nosi ren.
Nosi ren muşi şeni iya çkar mutu varen.

Nosik içalişepsna iri şeyi dvaçkinen,
Guşubğaşi “en k’ai ma vore” ya açkinen.

Ar nosi mik ixmarsna emuş nosi işinen.
Navarixmaras nosi p’ot’es vaguişinen.

Kimi nosi nosei k’arta nosişen k’ai,
Kimi nosis vauğun çkar mutuşen ambai.

Kimi mat’ori stei vadodgitun yedgitun,
Kimi saat’i stei vadodgaşi dodgitun.

Kimi irişen 3’oxle udodginu nunk’apun,
Kimis tolepe uz’in nat’en mat’en gunk’apun.

Nosi ren met’aksiten şvei k’umaşi stei,
Nosi ren ugoqazu dido didi kva stei.

A3’i iri nosei mitiş nosi vaunon,
Nosişi oxmarusti nosei nosi unon.

Nosei do uğnose mteli mutepe şeni,
İri şeni en k’ai muş nosi muşi şeni.

09.01.1995

 
© 2006 kolkhoba.org