ÇAİ K'ALA BİRAPA K’oçik not’rağodu: Gelapxedi rak’anişi k’ap’ulas Gego3’k’er do mu dolocan zen-rubas Domapeli k’aobas do xaobas Haşo mu mağodes e çai çkimi Çaik not’rağodu: Si var miçkin, ma mutu var mağodu Mu k’ai gi3’ont’u tasepe dodu Var momixtams çkva skani ot’rağodu Ha3’ mu mi3’ume e k’oçi çkimi K’oçik not’rağodu: Moxti edo livadepes kodirçi Zenis met’a rak’anepes konirçi Var nuxondun nazi skanis çkva k’oçi Xepe gomot’axi e çai çkimi Çaik not’rağodu: Mopti edo şuris egodvi tena Var moptik’on heşo mu vat’i vana Biç’iti doçili kogyodvi kyona Bozo gzas gegidgin e k’oçi çkimi K’oçik not’rağodu: Mu boğoda vart’a şk’ule ik’p’ali Nak’o 3’anas bikti do biburbali Soni gamabru3’u çaiş ç’uvali Xes koxomiskidi e çai çkimi Çaik not’rağodu: Tamo tamo t’k’obaşa mixiyaman Duğuni do ç’andapes oxiyaman Si izmoces gulur 3’k’arik giğaman Toli otxo gon3’k’i e k’oçi çkimi K’oçik not’rağodu: Ğali gextu zeni 3’k’aris ant’alu Sufras kogeskidu mç’k’udişi mpalu Sole bida gzalepe omant’alu Ar gza komo3’iri e çai çkimi Çaik not’rağodu: Nosi şuk’a va ren ki megit’axa Nç’olo va ren onas gelegit’axa Mxucis egacina şka megit’axa Heşo nosi moği e k’oçi çkimi K’oçik not’rağodu: Purkinoras pavri pavris ok’asfer Bozopeşi burgulepes golasfer Mutus var ğir çkar mutus var memasfer T’ot’is na gogiz’gvare çai çkimi Çaik not’rağodu: Gegiğik’on n3as na medgin murun3xi Var megagnen m3ika ivi ncir k’u3xi Eiseli goink’ani gok’un3xi Ma çkva mu goğoda e k’oçi çkimi K’oçik not’rağodu: Maxenuk’on t’ot’i megik’vatamt’i Ek’3’k’umt’i do kyoği mogik’vatamt’i Bozope 3’k’uneri biç’i sak’at’i Mtel dovizabunit e çai çkimi Çaik not’rağodu: İzabuner nç’amepe var eganç’en Hemuşeni berepe var meganç’en Mot gegondur ar mt’k’o let’a doganç’en Sum arşuni mbela e k’oçi çkimi K’oçik not’rağodu: Mot memotkvam nena skani memağen Ti mit’ubun çkva guris elemağen Bitişinam skanden met’a mu maven Ek’3’k’a gotk’oçare e çai çkimi Çaik not’rağodu: Ndğa giğut’u mpalu gyaris gyaxort’i Var z’iromt’i paxlaş minci ipxort’i Var zop’on ki mu k’aiti komoxti Vaşa toliz gak’nas e k’oçi çkimi K’oçik not’rağodu: Ekisperi kogelaxedu avla Ofidi bonz’oli buyuği nçala Ma heşo maz’iren k’oçi ren vana Nosiz kogamapti e çai çkimi Çaik not’rağodu: Ont’ule rak’ani çkar var dut’ali Gemotasi çkar mutu var gyut’ali Ha3’i muşen gavu guri nç’ereli Nosi so giğut’u e k’oçi çkimi K’oçik not’rağodu: Ma skidalas k’oçişi var bişine 3’anape golilu mtel gonoşine Mutus var ğir tipisti var nişine Ora meegilu e çai çkimi Çaik not’rağodu: Ham dğalepes dido k’oçi momixtams Var mgorum na paronepek gomixtams 3’ip’iape didi nçxomik geişkvams Haya nisimadi e k’oçi çkimi K’oçik not’rağodu: K’oçi bore mitişa var bicginer Ar mcixi 3’iğvelis var gebicginer Mxuci mxucis mepçam golobiciner Şana Lazonaşi e çai çkimi Çaik not’rağodu: Hemindoras mati ebiçiçkiler Lazonaş zenepes gebiçiçkiler Mitişa var bulur, var mebiçkiner P’anda skani bore e k’oçi çkimi Çai do k’oçi (juri xolo): Si çkimi ma skani mebisiminat Xepe gebik’limat, ok’obik’limat K’ap’et’i k’ap’et’i dolobik’limat Kogebixoronat Lazonaş avlas Çxalva 2000   © 2009 kolkhoba.org