LAZONAŞİ MESELİ Şilya do şilya 3’anaş k’ap’ulas Ar p’ot’enuri oraz Ğormotik kogultu ir k’oçiz let’a Şkit cumaşen met’a “Ağanepe gamodginit noseri ivit Mcveşepe tkvani şinit goişinit Seri murun3xepe mekçit 3xank’aleri Gontanaşi tana ora Rak’anişen egotanan mjora Noserepe ndğaleri gavan serepe Gogapinan didi 3’ut’a berepe Aha kiana eheti tuta Murun3xepe 3’ut’a 3’ut’a Jin n3a tude dixa İrdit edo imbralit” ya. Kyona kyodu iri xolosi Çxronossi çxoro nosi Heşo nena dodu vrossi. İri k’oçiz komeçu let’a Şkit cumaşen met’a Şkit cuma Şkit 3’ipriş t’ot’i Şkit oxoriş nca Heşo noseri heşo k’ap’et’i Dido k’ai şinomt’ez hemerepez Xai şeni xai, k’ai şeni k’ai t’ez Heşo çkineri heşo nosiyari Guri doluz’it’ez şkitizti şkito msumyari. Miz uçkin nak’o do nak’o ndğaz Lek’uri ovalamt’ez k’abğaz Xe do k’uçxe fili fili mtelli di3xiri Ti do t’ani pupuli Bandaleri bandaleri mulurt’ez Şuri dololaperi hungeri hungeri Şkit cuma t’u Şkititi gaçkinan Aramxut’u Ham na vez k’abğati heşo t’u K’ai şeni k’ai xai şeni xai t’u Çxindi mok’erk’eleri Gurp’ici ntomalyari Kva do nca steri heşo mencelyari Ğormotik komeçu ir k’oçiz let’a Şkit cumaşen met’a “E Ğormoti çkun duşmanepez lek’uri mobumkinit Çkun muşeni var mşinit? Şkit 3’ipriş t’ot’i Var vaşa k’abğa Kianaz var didven cumaloba, daloba do k’aoba Muşen gulti çkunden met’a let’a Emoçkendinit na Mute boz’ğaten berepeş korba?” Jin Ğormoti Tude şkit cuma Şkit 3’ipriş t’ot’i Ğormoti “Hemuş derdi n3’orumt-i Ak’o k’abğa dovit do Ha3’i let’a gorumt-i K’oçi k’oçiz guriz guri danç’at’u Koçi dixaz k’oçobate nanç’at’u Ham kiana mtelli şuriz kyanç’at’u. Tkvan muper let’a ginonan? Ma kiana aşi ndğaz na okobdvi Kiana var t’uşa nena na dobdvi Tkvani şeni k’ai tkvani şeni vrossi Çxronossi çxoro nosi Kiana n3as doloxe ar ç’vetela K’oçiz na anç’en Vaglaxti vasaglaxti do çxoro mt’k’o let’a Şvit ç’k’omit ibirit ixoronit Mu ginonan hemu vit Tkvan na mekçaten let’a Var işinasen coxo tkvanişen met’a İmbralit moişenit dumç’k’u steri iro do irote Mjora tkvaniz mot mulapamt empula p’ot’e Çkimi şeni na dobdvi kianaşi cenneti Tkvani t’az heti Giçkit’an haaa... Motalepe tkvanişen emaneti. Na şvanumt şuri Şurişi guri Vi3’uri, Atinuri Arkaburi, Xopuri Ma p’ap’uli Ma nana Nanaşi nana Mot noskurinamt tena Giçkit’anki ham dixa Çkimi şana Coxo tkvanite molişinaz Ti doxmeli Lazona. Yaaa...! Lazonaş hekyaye haşo diçodu Ğormotik Lazonaz ham nena dodu.   © 2009 kolkhoba.org