KOGİÇKİNİ VAR MİÇKİN Giçkin Var giçkin Var miçkin Çkin, Mzuğauçaş berepe moro mu giçkin Enni mele Tanağais 3xank’ala mjora na çxant’un k’ele Ar k’uçxe Lazonas Melen 3ixas Ar k’uçxeti K’urbeti. 3’anas ar ok’obinç’et Şilya do şilya 3’anaş morderi Gebaderi Mç’k’oni steri İxisti, dobasti, ğvaristi kebinç’et İr ç’vinobas komebinç’et K’aobaşa dop3xuk’ut Xaobas mep’t’roxut do Var memdruk’ut Çkar mutuşen var mepxup’umt Haya ren na var giçkin. Çkin Mzuğauçaş berepe moro mu giçkin Lazona Kyona Mcveşişen çkineri P’ap’uliş meçkineri Guri t’u3a miğunan K’oçi steri k’oçi şeni Haya ren na var giçkin enni Gom3udei oropa var miğunan Mşkorineri pxro3kitk’onti Ğormoti t’ai ! Kok’obit’axamt ar pan3’ala mç’k’udi gyari Var pşinaxumt navai Ko gebubamt miğut’ezk’on Ar ç’veti 3’k’ai Ti dudis maçanezk’onti inç’iri Kok’obit’axamt cuma k’ala Ar k’ak’ala ntxiri Moro e skiri Gemaş k’un3’ulepeşen Mep’ç’k’odut do isa, Çkva çaçxala gebulut Çkva t’oba misa Goimskimen Lazona Giçkin noğamisa Purkinoras purki boret t’ot’epes Nusalepe Bozope dadalams çaiş ont’ulepes Guxti skit’a tomalepes Gağari cğat’a tolepes Çkva çaçxala çkva misa Çkinei Sum ndğei noğamisa K’armaxa boret Kçe mç’ita mexuneri Termoni bipxort Yari elaxuneri Rak’anis sifteri boret Karmat’epes ğurni 3’ilavi steri irden biç’epe çkuni Guxti 3xank’ala murun3xepes 3’k’omilei tolepes Guxti Guxti do K’aobate moxti Siti Moxti Guri çkunis nek’na var gyobun Sontxa ginon goxti Ç’k’omi şvi Muntxa ginon vi Ar bixoronat Vit’var p’t’rağudat Ar golabdgitat noderepes Ar gobubergat Jur k’at’işi filisepes Çkva misa doxedi Çkva cinikis geşamxedit Ko mebinç’et ir 3’k’unis Haya ko melik’ori kogiğun na Kunis Gişkun Var gişkun Var mişkun. Na mişkun, Şkun; Ar pşinomt oropa do Lazona E kyona Lazona heya ren Oropa mu ren na 12 Ap’rili 2007   © 2009 kolkhoba.org