LAZURİ NUSA
K’inçi şk’ala miselu golukaçu
Ar not’exi carina kodikaçu
Berena muşiti p’ri e3’ikaçu
Gamaxtu igzalu Lazuri nusa.
Nez’i kek’işk’omu idu dulyaşa
Umoşvacu duşinamt’u yemaşa
Ar nandidi moyo3’ert’u mendraşa
Şuri keiç’opas Lazuri nusa.
Yema iyu ke3’axedu m3xulina
Kocet’axu k’varina do k’valina
Mendra kodaskudu ar ombolina
Xolo va meyiças Lazuri nusa.
Lumcişa duşinas var ok’i3’edas
Giktet’aşa mta yukiti dixenas
K’ap’ineri rak’anepe moyilas
Haşo dulya ikus Lazuri nusa.
Moxta do var koculunu pucişa
M3’upi iya va gamvalen mandreşa
P’ip’i nust’un extaşa oxorişa
Var açoden dulya Lazuri nusa.
Nek’na moyoxt’asi bere naç’apxen
Guri mvala ar jurti komvaç’apxen
Ağani ren mititi var caç’apxen
Haşo ok’i3’ilen Lazuri nusa.
Uneneli kogoşk’adgusu sini
Damtire goşk’axen muç’o guruni
Oxrasure şumsu mandili moni
Xvala okvaç’apxen Lazuri nusa.
Oşk’oman şik’ule k’ap’epe doşxus
Gok’alus gokosus dost’uresarus
P’ri ancirasiti bere docarus
Udoxunu ikten Lazuri nusa.
Haşo var ort’asen bo iroteşa
Miç’ibrasen berepeniş mirdaşa
Ayasen ap’ot’e himuti nusa
Mişvacasen hemora Lazuri nusa…
| 