GURİ ÇİÇKU NANA Mu qvi na var dogaçodinu qona, K’ap’ula k’ele elagiskidu 3’ana, Dixçini do xolo var dogaç’k’inden, K’ap’et’i xe skanis gogixta nana. Nisa moxti P’ulyaşi oput’eşa, Damtire do mtirişi oxorişa, Arçkvati aş teği berepe ordi, Trangik xela mekças guri skanişa. Ont’ule, oxori, qonaşi dulya, Dop’aminon yado var z’iri dunya, Şuri na komomçi şuri skanişen, Arçkva guri skani momçap gyozgiya. Puci na ç’valupt’i limci, ç’umani, Tkumert’i dulya ren çkimi dermani, Txirepunas na k’vati dişkape, Muç’oşi tirupt’i gza emtumani. Do3’ili qurz’eni, mjolepe patxi, Ar 3’ana p’ek’mezi var p’a ya var tkvi, P’ek’mezi do kyumepe çkin vimxort’atşi, Si xolo siniten lazut’i şatxi. Var dogaç’k’indeni şurimşine nana, Var dogibağu ek’o txirepuna, Arçkva brincepunas içalişept’i, Xoloti gorupi ç’anç’axepuna. A3’inerepe va renan skani steri, Varti meci uçkinan varti noderi, Skani steri gyari nam nisa ikips, Gyari var axvenenan nostoneri. K’alatiten tiri monk’a 3’anape, Domi3’vi k’ai, p’at’i, mskva nenape, Ham dunya do em k’eleti ixelas, Skani steri guri çiçku nanape.   © 2009 kolkhoba.org