MUÇ'O VİZ'İ3A
X3aperi 3’anapeş doloxe vore
Xomeri gyulepeş şurapes vore
K’ap’ineri nulun çkimi 3’anape
Mati dodgineri gurepes vore
Omgaruşi ora komoxtu a3’i
Ti çkimişen nosi gamaxtu a3’i
Guroni kovort’i a3’i var vore
Şkurina moxtu do amaxtu a3’i
Kiana çkimis te var domiskidu
Na vimxor gyarepe dolomiskidu
Aşoten mu p’a do muç’oşi pskida
Feleği k’aixeşa dolomoç’k’idu
Doviqvi but’k’uci va ren pukiri
Na pşvanup şurişen vikip suveri
Çelamure çkimi doxomu a3’i
Govulur ma aşo guri t’axeri
Kodolopskidi ma gemzuli steri
Toma gostik’eri mamuli steri
Umiteli steri xvala xvala pxer
Çili doğureli kimoli steri
Qoropa didi ren ma ç’it’a vore
Ar ncaşi tudendo ma let’a vore
Derdoni toliten muç’o viz’i3a
Çkar na var otanaps ar tuta vore
Stveli 2005
| 