![]() |
|
|
ეჩდოშქვითი ჩილამური
თქვან დუდიშა მუნომლუაფ ჯაშ წვანჯეფი,
ცაშ ნოტეხეფქ ანწი ვარა თე გურს ხირცქას,
თქვათ გიჩქუნა ყ’ათე შარა ვარდუ ეფი,
თქვათ გიჩქუნა ზისხირ გოპუნდ არძო ბირცხას.
ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი, ოკო უკახალე ეკმოსქიდე,
ყ’ათე რინაქ მუდგანერო ვეკმამორსას!
კოლხიდაშე წყურგილშორო გემწოფსოფი,
ჩქიმ სისქვამეს მებეჭუდუ მაბჟალია,
ოდაბადეშ თოლიშსინთე გეკობჭოფი
დო ხურხიშა ქიფხუტოლე მაფშალია.
ყ’ათე გურსუ ღურუშ ორან ჭვეთით ვარზუ,
მარა არძა მურიცხიში ლისმარ გეშქუ,
მუჭო ფიქრენთ - იბთირანქო ანწი გვარსუ,
ჩქიმ შარაქუ ბჟაეიოლიშე გემწოფეშქუ.
მიკმაჭაბუ ირფელ ართო, ბჯოგუ მერკე,
ებდიდორი, ქიპოპობრე, ეკიბლანდღვი,
შურშა ოკო თისხი დაჩხირ ქენიბგვერგვე,
მუსხის ვაგურზ ჩქიმი ბირგული დო განთხი!
წანეფი, წანეფი, ეკობხართეთ ხაჯალურო,
ეჩდოშქვითი ჩილამური გეკვოშქვიდე,
ჩქიმჯგურეფი ვეშქურინე ღაჭალურო,
ლერსი ოკო უკახალე ეკმოსქიდე!
ყ’ათეჯგუა წიმოკინა კოჩის ვაშუ,
ნამს ღურუშფერ ართშა ვარა ვეგნოდვალუ,
არძა ჭუაქ მა ვამა ვილ, მა ვეშმაშუ,
გურც ნტყოლირი ლეკურეფქუ ვამათვალუ!
ეჩდოშქვითი ჩილამური გეკვოშქვიდე,
ეჩდობრუო მიხაზირენს, ალბათ, თორსას,
ლერსი, ოკო უკახალე ეკმოსქიდე,
ყ’ათე რინაქ მუდგანერო ვეკმამორსას!
|
|
© 2006 კოლხობა.ორგ
| |
![]() |