სესია სესია! ჩქიმი ჯიმა სესია! მუ გიჭირცნი, სო გაჭუნი, ქოგიწოლე ჭესია. მარა თენა გიჩქდანი არძა ტანჯულემცია: მონა უფლება დო ლუკას ძალით დეუფლენცია. სქანო ჯგირი ვააკოდ დადიას ჭყელცია. ვართი სქანი მაჭკუმალი დიდი თავადემცია. ჟინოსქუა, ვაჭარემც, ბერემც დო პაპემცია. სი დორღუმპეს, მარა მუნემქ საქმე გეიშენწყესია. ჩხოუცალო ორჭოფეს, ვიშო გაგმორჩესია. გერხე, რჭვალუნც, რტყაბარანც რუს ხემწიფე მხეცია. რუს ხემწიფე ჯალათი რე, დუდიშო იწენსია. სქანი ტანჯვა ვაანარღ სქან ზისხირით რძღელცია. მუ გიჭირცნი, გაცხადენი, ნებას ვაგარზენცია. ოსოგითე ღვარუენი, სქანც ვადეჯერცია. ვადარზოგენც, დორყვილუნც, მითინც ვაკითხენცია. ოშ მილიონ მუშა ხალხის ცალხეთ იბურთენცია. აბა ჯიმა, სესია! მუთ ითვინე თესია?! ენა ართი გიწიი დო შხვას გეგონე ბრელცია… ჭკორ-პატნობაქ მედინუვე, ტყურა გაღორესია. სქვამი სიტყვათ მოგრთამეს, განთხი მერკვათესია. უჩა უღუ გერდგუდუნი, კითათ დოღაფესია. ტყვია ქიგუვძინეს დო კინჩხის ქიგერდგესია. მის უჯინექ, ჩქიმი ჯიმა! ვაარწყექო თესია?! გეითოგორი, გეითონთხორი ბოროტებაშ ფესვია. დიხა ირკოჩიში რდუნი, ვარია ქოთქუესია. დიხა მუნემქ გიიტეს დო ერჩხილც ქიგეიტესია. გაგმორჩეს, სქანი ფასი კინ სი გაიწოგღესია. სი აქ ჭკორო ქიდოსქიდი ნგერეფიში ხესია. თავისუფლება დო დიხა ქიიშიი, სესია, დო უკული სი ქოძირუ ჩედღას ბედნიერცია. უკუმელას მულარექი, ქოძირ სინათლესია. საუკუნოთ დეეუფლენქ ედემც მშვენიერცია. ირ უფლებადინაფილი, ყ’ვერე, ყ’უნგა სესია. ონენდალო აწუვრექ მუქთახორაშ ძესია. ჯგირც ვაჭკუმუ, ვამკგოქუნცუ, ყ’უდე ვაგიღ თე სია. შქირენ, ჩხურუ დო ლახალა ირო გაწვალენცია. დღაშ დო სერით ქომუშენქ, ქეეყ’ოთა ხესია. სი მუშენქ, შხვას მეუღუ, მუ მერჩანც ხვესია?! შხვას უხონ, შხვას უხაჩქ, შხვას ეურღვა ღერცია. ირო ჭვიტე კილეგანც სქან მაღაზაშ რჭელცია. გოკურცხ, ანწი ნუმუ ლურცუ, ნუმ აშაძუქ ტვერცია. ღურა უჯგუ, დამიჯერი, ეცალ სიცოცხლესია. დუცუ ვაარწყექ, ვარა ნდემი რექ, სესია. გოკურცხუდე, სქანი ნტერც გეუყ’ოთა ფერცია. მანგარ კილე გიღუ, მარა დიხა ვემერჩესია. დო უფლებადინაფილი, ჯაჭვით დორკირესია. სქანი ლუკას სქან ხეთ არზე ლალა გვანილემცია. სი ჭკოლა რექ, შულადირი, დატანჯული სესია. აბა ჯიმა, სესია! ვაარწყექო თესია?! მუშენ არზე მელატურემც სქანი ნამუშერცია?! თოლი განჯი, გიკურცხინე, დეეკვირი თესია. სი თამამო ქუმწუვძახი ართობაში ნტერცია. ღორონთქ დიხა ქოდგახვამუ, ნგერემქ მიდაგღესია. ნგერემც დიხა სი მიდუვღი, მა გირჩენქ თესია. შეგნება დო სქანი ნძალა ჭირშე დაგირსხენცია. ყ’ოროფა დო ართობას ქრისტე ქადაგენცია. ზუგდიდი, 1904   © 2006 კოლხობა.ორგ