![]() |
|
|
დიხა
ჯიმალეფი! ბედნერება
ხოლოშარე მონჭაფილი.
დიბრთინუათ ჩქი სამოთხე,
ანთასფერით მოქარგილი.
ქიანას დიხა მუთ ქორენი
უჭვარუდო, ეჭვარილი,
დიხა ირკოჩიში რდას
ღორონთიში გოჭყაფილი.
დიხა ორე, ჯიმალეფი,
კეთილ ღორონთიში ძუძუ.
არძაქ თინა ბწუათინი,
ათე სამართალი უძუ.
თე ქიანას მით ქორენი,
დიხას მორდილეფო ყ’უნცუ.
დიხა დიხაშ მუშაშირე,
მარა ვებჩინენთ დუცუ.
დიხა თიში ოკო რდას,
მითი თის ამუშენცნი.
მითი მთელი კოჩანას
კეთილ ქობალც უწენცნი.
დიხა თიში ოკო რდას,
მით თის უფით ბონუნცუნი.
მით თის ხონუნც, ხაჩქნც დო
ბარით თის თხორუნცუნი.
დიხა! დიხა! ჯიმა, დიხა
ირკოც ართო მიღუდანი!
ართობა დო ჯიმალობა
დო სიმართლე ჩქი ბჯღუნდანი.
დიხა ირკოჩქ იმუბშუათ,
მუშაობათ მიჩქდანი.
ნამუშერიში მეჯინათ
გური რძღელი მიღუდანი.
თე ქიანა დიდ ღორონთქ
საბედნეროთ ქომუჩეს.
მარა ნგერემქ გერჩქინდეს,
ლუკა გაიწომყ’ოთეს ხეს.
ირო დუცუ მუნობხენა,
უჩათ მოძირანა ჩეს.
ჯიმალეფი! გებდირთათ!
ნგერემც გეუყ’ოთანთ ფერც.
თავისუფლება დო დიხა
ჩქი მოკონა ათე ჟირი.
მთელ რუსეთიშ ხალხეფწკალა
ჯიმალობა გვალო ჯგირი.
დიხაქ ჩქი ვამაშის და,
ტუტას იპიბთ ელახვილი.
დიხაშ მახაჩქალ მუშაშო
სამართალი იყ’ი ჭვილი.
დიო-დღარო სამართალი
ჩქინო ორე გოლოფირი.
ვამიღუნა ჩქი ცხოვრება
ჯიმალური, ყ’ოროფილი.
არძას ართო ემიძუნა
უჩა მონობაშ ბორკილი.
ანგელოზი ინგარცუ დო
ეშმაკი რე გომოოძგვილი.
თავისუფლება დო დიხა
სამართალით მიბთხუათ.
ვამუჩეს და ჩქინი ლუკა
ჩქინი ხეთ გიბტუათ.
ანწი ვარა ვაარწყეთო,
ნტერეფ მუს მორთუნანი?!...
სიმართლეში გურიშენი
პიბლუნა დო ბთოკუნანი.
მობაღუნა, იბთვინითი,
ჩილამური ვობითინი.
დიბრთინუათ ართობულო
უფლება დო ლუკა ჩქინი.
კოჩქ კოჩო გინიირთას,
მონაქ მითინქ ვეყ’უას.
მიდაღალა-აბრაგალაქ
დოღურას, გეთუას.
ჩქინდუდიშო ჩქი ვარჩიათ
ჩქინი საქმე შინაური.
რუსეფწკალა მიღუდანი
ჩქი კავშირი ჯიმალური.
გისხუნუნო, კინი რყ’უნდას
მაზოჯალი, აპეკუნი?!
ათეს ჯგირო დეეკვირი,
ათეს ჯგირო უჩი გური.
გობკურცხათ, ჯიმალეფი!
გოუმორძგვას ართობას.
გოუმორძგვას სიმართლეს
დო ყ’ოროფაშ მეფობას.
გოუმორძგვას სანატრელი
ძვირფას თავისუფლებას.
გოუმორძგვას მუშემც დო
კეთილ შრომაშ უფლებას.
ზუგდიდი, 1904
|
|
© 2006 კოლხობა.ორგ
| |
![]() |