თავისუფლება ჩქი ვორეთ დიდ ხვამარდი დო მებჩურუნთ უჩა ზღვას. ჩქინი საქმე ათენარე: ქეკუონჩურათ მელენ ძგას. მელე გეკმანჩურესდა, თექი ქობძირუნთ დღას. მარა ნტერი მაჩერენა, დიო ვავორეთ შქას. ნტერქ გვალაში მაშხვა ღუზა ინი ზღვაშა გოუტუვ. ჩქინ ხვამარდი რკინაშ ჯაჭვით ათე ღუზას ქოუსქუუ. წიმი მიიქანჩუანდ ჩქინ ხვამარდი ამდღარიშა, მარა მუთაქ აღოლუვ რკინაშ ჯაჭვი მანგარიშა. აჰა! ასე ვიშ გოსოფუ რკინაშ ჯაჭვი ხვამარდიქ. ათეთ ართი დიდ ნაბიჯი ბჟაიოლშე გოდგ თიქ. ამდღა მა თქვა მოგიხვამანთ თე ნიბიჯიშ გოდგუმას. იმენდირე ნაბიჯემც ხოლო გობდგუნთ ანწი შხვას. ათენარე, ჯიმალეფი! არძაქ გიბკურცხინეთინი. უსამართლო ხელმწიფეს ტახტი გელუვრთინეთინი. ჩქინ კოჩური უფლებეფი ჭე ვარა დიბრთინეთნი. ასე რკითხენთ: მუ გოკონა?! ანწი მუს აპირენთნი. მუჭოთ ამდღა ორწყეთნი, ნება ქორე ჩიებაში. ნება ქორე ჭარუაში, საზოგადო ყრილობაში. ნება ქორე, ტანჯულემქ გებგათ ჩქინი სატკივარი უშქურანჯო ართიანც ქოუწუათ სამძიმარი. ნება ქორე, ურჩქინდემქ ექიმიშა მებრთათნი. ჩქინი ჭირც მუ ჯოხონი, თის გაიწობკითხათნი. თე ჭირც მუთი ოხვარუნი, არძაქ თინა გებგათნი. რეცი გაიწუუღათ დო აფთექაშა მებრთათნი. მარა ვავა! ჯიმალეფი! აფთექარე ეჭკადილი. ზარბაზანით კარც გერენა გვერშაპეფი ეჭყვადილი. ჩქინი ტანჯვა ვანარღუნა, ცოდათ რენა ებშაფილი. შუნა, შუნა ზისხირც, მარა გვერდო რენა მორძღაფილი. აფთექაშა გილუვბუნა ჩხორო ფულანდიში კარი, მათხილარო გეურენა ჭყელი ნგერეფიში ნჯარი. ინეფწკალა ვაგუურცუ ვართი სიტყვა, ვართი ქრთამი. ჩქი მირცხენა ხვალე ართი: შეგნება დო ჩქინი ნძალი. მორო! მორო! ჯიმალეფი! ნება ქორე ჩიებაში. მარა წამალ ვამიღუნა ანთება დო ციებაში. დუდიშ ჭუა, ქვარაშ ჭუა, ჩხურუში დო შქირენაში წამალქ ვამაშიის და, ვაგომითანდუნა დღაში. გობკურცხათ, ჯიმალეფი! არძაქ ხე გიმიბღათ. უსამართლო ხელმწიფეს სრულას ტახტი ოკუვრღვათ. აბრაგემც, თხობელემც, ნგერემც ბოლო მოუღათ. პაპემც, შარას ჩილათირემც, სახარება გოუნწყათ. ზუგდიდი, 1904   © 2006 კოლხობა.ორგ