![]() |
|
|
დუნაჩინა
აიეტი დო ქუჯის
ჩქიმ აიეტი დო ქუჯი,
თქვან სახელეფს ქუჯინით,
ვაიჩქუნა ჩქინ ოკოლხე
მუშ მასქვამა რდ, მუ ჯგირი დ…
მა გიჩინანთ, ჩქიმ ბოშეფი,
ჩქინ ოკოლხეს ქუმინჯით,
ხანი მიარეშ კინოხ
სოიშახ ონჭუდ მუ დიდი რდ…
მუთუნ გინაჭყვიდალ იყ’ინ,
მუს გიწინთი’ნ, მირჩქილით:
ორქო ოშშა გაწონით დო
გერ-მოჯგირე ქიჩინით…
მალიმარო ხაზირ ორდათ,
რაშს მოსართე მუნჭირით,
გითმაჩამალ-გიმმაჩამალს
ოლი შარა მუჭკირით…
ქორთუს დღემუს ვაწეკინდათ,
ნირგეფც ღვალემს ქოჭიმბით,
აშხარეფქ მუგაკათესდა
ყ’უჯიშ ჯინჯის ქოშიმბით…
ოლაზეს, თქვან ჯუმალეფს
გაჯუნით გურ-კიდირით,
ლერს-არიკი ართო ჭარით
ართო ხვაპით, იბირით…
ციმუშ ბუნა ვეთაკილათ,
ოქიმინალ ქიმინით,
მაჟირუას დიჭყანთუნი
ფსუა წვანდშა წიმილით…
ირფელიში ოწოხოლეთ
ონწეშ ნინას მუკულეთ,
ნინა ჩქინი ოხვამერი
იგურეთ დო ოგურეთ…
ტომბათ ოგურეთ, ბონას,
ჭარუა-კითხირს გუძინით,
ტერი დღას იჭვალიკანდას:
მუს რე ვორწყეთ, მუ ბძირით!
ქვირ-ომბოლს ქეშეხვადუთუნ
შურ დო გურით მეხვარით,
ჯგირობუა ქუას გედვით
ჯგირობუა გეხარით…
პოეტეფს დო ჭარუეფს
შურ დო გურით ხე უნწყით,
საწმოხონოთ ისარჯელით
ხონარ ხონარს მეუნწყით…
გინნადგუდგა ჩქინ ოკოლხეს
ფურ-უბადო უჯგირით,
უმინჯურო ვამწოსქიდას
დუდიერო ქუმინჯით…
იფრელქ ვეშგალებესი’ და
თქვან დუც ხათე ქუჩინით
მუათქვანიშ დუნაჩინა
თქვან სქუალეფს დუჩინით…
მა თქვა მუთ დოიჩინითინი
კინოხონეფქ მოგურეს,
ვაკეთით და, გიჩქუდანი
ვედიბნტირექ ოშურეს…
|
|
© 2006 kolkhoba.org
| |
![]() |