![]() |
|
|
შამანეფიშ ქანაშ იშო
შამანეფიშ ქანაშ იშო
თირქ მიდეღას ქიყ’ი ქანა,
ოდინაფშე კუჭ-ხუმაფილ
გერეფ დიდას იგორანა.
ბორია ყ’ურანც ტურაცალო,
სერი რენ დო თუთა ვარე,
ამდღა ვარდა ჭუმან იშენ
ღორონც შურსი’ მივაბარე.
ჩე მუნაფა ქაქთომირჩით,
ჩე მუნაფა ქინმოქუნით,
ღურუქ ჭახანს ქიცალუ დო,
აფხაზეთშა მიდომყ’უნით!
დიდა თექ პუნც, მუმა თექ პუნც,
თექ პუნც მამი’და მარდუალი,
ნუზუშ ჯინჯის ჯვეშეფიში
საფლე-გურიშ მაჭუალი.
გალე თი’ნს დო მის არჩქილე
გურჭყოლირიშ გურიშ ჭუა,
რინც დო სისმარც მიშეფაფუქ,
გოშინას მურს უყ’უნუა.
ოქუმს ასე დამორჩილ რე,
ორქოშ ფუთქი მიკოძ ლაფას,
აჰ, შურ ქომწი, მუჭო გურზათ
თესხე გურიშ მი’კოლაფას?!
ღუმურიშის ყ’ურძენს წილანა,
მანჭარიშ შურ ინთხანს სოფელს,
ფრანგულა დო იზაბელაქ,
ლაგვანიშ დუდ გეგშასოფეს.
ოქუმ-წყარპიც წყარიშ დიდა
წყარიშ სარკეს ინაჯინე,
ტყას ოჩოკოც გილაჩაკანც,
სალამ ოკო ქი’მეუჩინე.
მელენ ბორია მოლენ ბორიას
ნუზუშ ჯინჯშა იჭანუანს,
თუთარჩელას მაფშალია
ბირა-ბირათ ოთანუანს.
შქასერს რეყეს წყარ გეჩენდუ,
მიკოთასუნს ტყაბიშ ფუთქურც,
ჭიჭიკეფიშ ღვათა იჭყაფ,
ქათალანძეშ ღალიშ გართუს.
გოთანდუნ დო ტორონჯ ცაშ კარს,
ცაშფერ კი’დი’რს ქიმკახატანს,
მოგოთანეს თოლჯღარ ჭურჭულ
ანარაშ დუც გაჩენდ ჭახანც.
ოდინაფუ, ქანაშ ბოლოს,
ყ’ინქ მიდეღას ქიყ’ი ქანა,
კუჭ-ხუმაფილ გერეფ ტყაშე
მერეთმოსლას ირცქინანა.
ბორია ყ’ურანც გურიშ-საჭო,
დისერუ დო თუთა ვარე,
ამდღა ვარდა, ჭუმან იშენ,
ღორონც შურსი’ მივაბარე.
|
|
© 2006 კოლხობა.ორგ
| |
![]() |