რამაზ კუპრავა (1948 - 2010) პოეტ რამაზ კუპრავაქ ერჩქინდ ნოღა ზუგდიდს 1948 წანას, თაქ გაათუ სუმ ოშქაშე წოფულა. თიმ წანას მიშელ ქართიშ უნივერსიტეტიშა, ნამუთ გაათუ ჟურნალისტიშ დიპლომით. სტუდენტობაშ წანეფს დევემაყ’ალი დიდ პოეტ შოთა ჩანტლაძეს. უნივერსიტეტწკუმა ართო იგურუ უნივერსიტეტიშ ოზეს “შოთაშ აკადემია”-ს. მისით “ისტმატ”, “დიამატ” დო “პარტისტორიაშ” გურაფაშ გურ ვემიალედსნი, ათაქ, “შოთაშ აკადემიას” უსხუნუდეს “გურაფა”. თაქ, შხვა პოეტეფ დო ჭარუეფწკუმა ართო, გეჩინებაფუ გმორჩქინელ ქორთუ ჭარუ გურამ დოჩანაშვილი. ჟურნალისტიშ დიპლომიშ ეჭოფუაშ უკულ სოხუმს, “საბჭოთა აფხაზეთი”-შ (“აფხაზეთის ხმა”) რედაქციას ქიდიჭყ ხანდა. ეჩდოვით წანაშ უკულ ოაფხაზეს რუსეთ-საქორთუოშ ჩხუპიშ პერიოდის გეგნიყ’ონეს აფხაზეთიშ ტელე-რადიოკომპანიაშ ქორთულ პროგრამეფიშ რედაქტორო. რამაზ კუპრავას ართიანს მინონწკარილ ტომეფით ვეგნუშულიდ მუში მაკითხირალეფი. “ლექსები”, “ლურჯი ბორანი”, “მონოლოგი”, “მიხაკები მთვარეზე”, “ირიათონი” დო ბოლოს “ლაზონა დო მარგალონა”. ნთიში ოთეატრე რეცენზიეფი დო შხვადოშხვა სტატიეფი უმუხარცქუო ენიწკიპატუდ პრესაშ ხიმფორეფს. კუპრავა გიშაგორეს აფხაზეთიშ მენცარობეფიშ აკადემიაშ აკადემიკოსო. რამაზ კუპრავას მუშ ჟურნალისტურ ბიოგრაფიაშ ართ-ართ ოსარკალაია ხიმფორო მიოჩქუდ მარგალურ (კოლხურ) ნინაშა გაზეთ “მაფშალია”-შ გიშაშქუმალა. ქორთულ ნინაშა ჭარილი დო გიშაშქუმალირო გახაზირებულ აფუდ “გიშნაგორა” დო პუბლიცისტური წიგნი “მეგრელთა სულიერი და ფიზიკური გენოციდის მცდელობა” ნამუთ მუშ რინას ვედეცალ სამწუხაროთ. რამაზ კუპრავა დოღურუ 12.09.2010 თარიხის. უპუნც ჩილი ნანი გამისონია დო ჟირი ბოშკოჩი აიეტი დო ქუჯი.