მარგალონაშ დიდი ლიმა მარგალონაშ დიდი ლიმაქ 20 წანას გეგრძელუ (542- 562) დო ბიზანტიელეფიშ გუმორძგუათ დესრულუ. მარგალურ ლიმა დეტალურო აფუ აღწერილ პროკოფი კესარიელს დო აგათია სქოლასტიკოსის. მარგალონას, ნამუთ უჩა ზოღაშ ძგას მდებარენდუ, კავკასიაშ გვალეფიშ მნიშვნელოვან გინოულარემს აკონტროლენდუ, ნამუსით სტრატეგიულ მნიშვნელობა უღუდუ ჟირხოლო იმპერიაშო. ბიზანტიელეფშო თენა რდუ ბარიერ, სპარსელემს უჩა ზოღაშა ვემშურთუმუდესკო თიშენ. სპარსელ სასანიდემქ დეთანხმეს მარგალონა დოსკილადედკო ბიზანტიაშ გავლენაშ სფეროსი 532 წანას გედვალირ სამუდამო მშვიდობაშ ხელშეკრულებათ. მარა ბიზანტიელეფიშ მცდელობას, საკუთარ ადმინისტრაცია დუნიშნებდესკო რეგიონსი, თეს მაუნუ მარგალეფიშ აჯანყებაქ 541 წანას. მარგალეფიშ მაფა გუბაზიშ მეშვეობათ პერსიდაშ მაფა ხოსრო | მარგალონაშა მიშმურს დო ეთმეჭოფუნს ბიზანტიელეფიშ მთავარ ჯიხას უჩა ზოღას_პეტრას, დო ქიანას მუშ პროტექტორატო აღიარენს. მარა შაჰიქ ეცადუ მარგალონა ზოროასტრიზმიშ რელიგიაშა მუქციებუდუკო, მუსით ქრისტია მარგალეფიშ უკმაყოფილებაქ მაუნუ დო მაფა გუბაზიქ კინ ეჯანყუ 548 წანას, ასე სპარსელეფიშ წინაანდეგ. გუბაზ მაფაქ მოხვარა იუსტინიანე-ს ქოთხუ დო ალანეფ დო საბირეფ ხოლო გემშეონუ მუშ ალიანსშა. იუსტინიანექ 7.000 რომაელ დო 1.000 ზან მაჯღონუ გუბაზიშ მიოხვარებშა დო პეტრაშ ჯიხაშ გასამანგარებელო. სპარსეფიშ გამაგრებაქ მირმიროშ მეთაურობათ დამარცხუ ბიზანტიელეფიშ ჭიჭე ძალა, ნამუსით პეტრაშ ეჭოფუა ოკოდუ. მირმიროსიქ ჯიხაშ დაცვაშენ 3.000 მეომარ ქიდიტუ, მუქ სომხეთშა მიდართუ. მარგალონას დოსკილადირ 5.000 სალდათ დაგისთუსიქ (საბირეფიშ უნჩაშიქ) განადგურუ ფაზისიშ ლიმას 550 წანას. სპარსეფიშ უკულიან მიშულაქ ხოლო წარუმატებელქ იყუ. მუნეფიშ უნჩაშ ფაროქან ცხენწყარწკუმა ლიმას დოყვილეს. ბიზანტიელეფიშ ახალ მეთაურქ დოშკირიტუ აბაზგეფიშ პროსპარსულ გიშულა. გეჭოფუ პეტრა დო მირმიროს ჯიხანქუჯიწკუმა (არქეოპოლის) დამარცხუ 551 წანას, მარა მირმიროსიქ მახერხუ ქუთეშიშ დო უქიმერიონიშ ჯიხაშ ეჭოფუა დო გეგნუჭკირუ ბიზანტიელემს მნიშვნელოვან შარეფ უღელტეხილეფშა. 553 წანაშ ზარხულს ინა ხოლო ართ მნიშვნელოვან გომორძგვაფას აღწიენს თელეფისთიწკუმა დო ბიზანტიელემს აიძულენს უკახალე ნესოშა დორთინას. მირმიროსიშ ღურაშ უკულ სპარსელეფიშ სამხედრო მეთაურო ნახორაგანქ დინიშნუ 554 წანას. ინა წარმატებულო ამარცხენს ბიზანტიელემს ონოგურწკუმა დო გორაუ თინეფ ჯიხანქუჯიშე. თე დამარცხებაქ ართიანს დაპირისპირუ ბიზანტიელეფ დო მარგალ გენერალეფ. მაფა გუბაზიქ იმპერატორ იუსტინიანეს ინფორმაცია მიონჭირინუ ბესაშ, მარტინიშ დო რუსტიკეშე. ბესა იმპერატორქ ქიჭანუ, მარა რუსტიკექ დო მუშ ჯიმაქ გუბაზიშ ყვილუა მახერხეს. მარგალემქ იმპერატორს მაფათ წათე, გუბაზიშ უნჩაშ ჯიმა დანიშნებაფუეს. სენატორ ათანასექ ყვილუაშ საქმე გეგმიძუ. რუსტიკე დო იოანე ოჭოფეს, გასამართლეს დო სახალხოთ დუდ მეკვათეს. 555 წანას მოკავშირეემქ დირთინეს ჯიხანქუჯ დო სპარსეფ ფაზისწკუმა (ფუთ) ხოლო ართშა დამარცხეს. უკულიან წანემს ბიზანტიელემქ გვალაშ ხალხეფიშ მისიმიანელეფიშ დო აფსილეფიშ გიშულა დოშკირიტეს დო საბოლოოთ გორაეს სპარსეფ ქიანაშე. 557 წანაშ ზავით დესრულ ლიმაქ ბიზანტიაშ დო პერსიდაშ შქას. 562 წანას გედვალირ ჟარნეჩდოვით წანიან მშვიდობაშ ხელშეკრულებათ ხოსრო-ქ ქიჩინუ მარგალონა მუჭო ბიზანტიაშ ვასალ ქიანა ირწანიან გინაგაფალიშ მანგიორო.