|
DİDO GİNZ'E DO MEÇ'İRELOBATEN NA İTKVEN AR COXO
Amerik’aşi Masaç’useti coxoni eyalet’is na ren ar t’ibaşi coxos eşo-aşo var, 45 bonca uğun. Am t’iba, eyalet’işi oşkendoni ar raionis na skidun “Nipmuck”uri svalonepeşi oput’eş xolos ren. Am raionişi k’oçepeş k’eleşenti dido meç’irobaten na itkven am coxo aşo ren:
“Chargoggagoggmanchauggagoggchaubunagungamaugg”.
Kianas irişen ginz’e do otkuşi muşi dido meç’ireli na ren am coxoşi sebebiten, namtini k’oçepe dido derdoni renan. Namtini k’oçepes am coxo okturapu naunt’es şeni dido oraşen doni ç’eşidi do ç’eşidi k’ampaniapeten hukumetişen mxuci gorupt’es. Mara am coxo na qorops xalk’işi reak’3ia ek’o k’ap’et’i rt’u ki, hukumetis, am coxoten derdoni na renanpe şeni, mutu var axvenu.
Coxo muşis 15 “g” na uğun t’iba şeni, namtini p’oet’epek leksepe ç’areenan do entepeş doloxe namtini leksepeti beste xveneri ren. Edo çinoberi mabestepeş k’elen na ixvenu birabape a3’i am k’eleni do çkva k’eleni xalk’işi şkas dido p’op’ulari ren. Namtini birabape “Nipmuck”uri svalonepeşi erovnuli marşi steriti işinen.
45 bonconi am coxok “Nipmuck”uri svalonepeşi nenaşen mulun yado içkinen. Asti muşi şeniti aşo itkven: “ Sin skani k’ele do manti çkimi k’eles na ren t’ibaş p’icis çxomi p’ç’opat.”
|
TÜRKÇE
