|
RUSETİS OKORTURAŞİ ANK'ET'İ
Tbilisis na iqu casusobaşi k’rizi do emuşk’ule Rusetik na qu k’ap’et’i nodgitape, Rusepeşi Kortuepeşa o3’k’omilu irxolo goktiru. Mosk’ovas na ren Xark’işsimadaş Goşogoruşi Ok’rebuleşi (VİTSOM) ank’et’işa na ak’atu Rusepeşi, çkvaneri k’itxvapeşa na meçes coğabepeşi por3entoba aşo ren: Oşişen 61-ik Okortura şeni “K’orsanuri oxen3ale” ren ya tkumers, oşişen 31-ik Okorturak Rusi ofi3erepe casusoba ikipan yado na moloxunuşi sebebi şeni, Rusetis oğinz’ibu do emuşk’uleti doloxeni dulyape çkinis mak’atenan yado otku şeni na qu ar “k’omp’lo” ren yado isimadeps. Oşişen 37-is mteli Kortuepe Rusetişen ixtozinas ya unon.
Rusepeşi oşişen 18-kti Okorturaşi am t’ak’t’ik’i oxvenuşi sebebi şeni, let’ape muşis na ren Rusi bazapes do Apxazia do Omjore Osetiaşi Rusi askerepe otxozuşi maana ren ya tkumers. Ank’etişi mak’aturepeşi oşişen 14-k, Okorturak “Amerik’aşi Ok’ont’aleri Oxen3alepe do NATOşa mek’iroba o3’iramu şeni” aşo ikips ya zop’ons do oşişen 12-ikti, muşi dobadonamşinepeşi tolepe tereşi doloxeni p’roblemepeşen goktiramu şeni aşo ar t’ak’t’ik’i ikips ya tkumers.
Rusetik moxtasneri p’eriodis Okorturas muç’o oğodas yado ar k’itxvaşati, ank’et‘iş mak’aturepeşi oşişen 40-ik “Rusetis Okorturaşa ek’onomik’uri embargo oxvenu dvaç’irs”, oşişen 37-ik “Rusetis ak na skidun mteli Kortuepes otxozinu dvaç’irs”, oşişen 20-ikti “Okortura k’ala na miğunan iri gzaşi menk’ilu do p’ost’aşi k’ont’akt’i meç’k’vidu, dip’lomat’iuri k’ont’akt’i oçodinu domaç’irnan” ya tkumers.
|
TÜRKÇE
