DUDBUT'K'A

JURNALİ MAPŞALİA GAMİÇKVİNU

Edit’ori muşişk’elen “Margaluriten na ç’arups malekse do maç’arepeşi xonari” oqopinot na molişinen Mapşalia coxoni jurnali Okorturas gamiçkvinu. Jur tutas ar gamiçkvinasunon yado na ignapinu Mapşaliaşi kunyeşen na vigurit k’onari, Zugdidis na gamiçkvinu jurnalişi redak’t’oroba Ramaz K’up’rak ikips.

T’abldoturi formas vitojur gverdi oqopinot na gamiçkvinu jurnalişi maartani gverdis edit’orişi noç’are k’ala Daniel Pipiaşi surati, mk’ule avt’obiografia, leksepe muşi do 3ot’ne Dadiaşi heykelişi surati gedvaleri ren. Majurani gverdis Laşa Gaxariaşi, masumani gverdisti Alio Kobaliaşi leksepe ç’areli ren. Maotxani, maxutani do maovrani gverdepes Ramaz K’up’raşi mk’ule avt’obiografia k’ala çkvadoçkva temapes ç’areli simadape muşi ren. Maanşani gverdis Lazepeşen leksi do ç’ara na ik’vanden ar ocoxinu k’ala Xasan Helimişi, Munir Yilmaz Avci, Fexri Mtanebiva do Selma Koçivaşen leksepe do xolo ar analizi gedveri ren. Maşkvitani gverdis Ernest’i Hemingveyişen goktireli na ren ar p’aşura gez’in. Maçxorani gverdis Rinos K’vara3xelia do Edem İzoriaşi leksepe, mavitani do mavitoarani gverdepes Ramaz K’up’raşi leksepe iz’iren. Çodinaşi gverdisti Anzor Lomaiaşi mk’ule biografia k’ala ar p’aşura do jurnalişi kunye ç’ars. Arxvala, jurnalis leksepe gedvaleri na ren maleksepeşi oşkendas Guri Ot’obaia do Giorgi Siç’inavaş leksepeşi varoz’iramu mosimadapes.

Na içkinen steri Soviet’uri p’eriodis dido mk’ule iqvasnati, 1930-oni 3’anapes K’azaxişi Gazeti, Samargaloşi Çai, Narazenişi Çai, Samargaloşi Tutumi, Maxorxali do K’omunari steri Margaluri gazetape gamiçkvineet’u. Edo xolo andğaneri ndğas, Margalepek didopeten na skidunan Apxaziaşi Avt’onomiuri Resp’ublik’aşi Gali coxoni regionis Rusuli do Apxazuri nenape k’ala Margaluritenti na gamiçkvinu “Gali” coxoni ar gazetaşk’ule Mapşalia, Margaluri oqopinot na gamiçkvinu majurani gamaçkvala ren.

Mapşalia “bulbuli” tkvala ren. Bulbuli, mskva do mağali xonaroni, majura k’vinçepeşen çkvaneri oqopinot seristi na stvinups ar k’vinçi ren. Coxo muşi steri Mapşaliaş gamaçkvalati şurdolodgineri, ginz’e skidaloni do cuma nena Margaluri na oskedinaps do oxampaps ar jurnali iqvas yado vuxvamupt.



                                                                                                                                                              TÜRKÇE