|
LAZURİŞİ GRAMERİ: "LAZURİ NENAÇKİNA"
Şurimşine coxoni Lazuri-Turkuli leksişi svara do Lazuri P’aramitepe coxoni Lazuri-Turkuli p’aşurapeşi k’oroba na uğun Munir Yilmaz Avcişi majura ar xandati “Lazuri Nenaçkina” ren. Lazuri Nenaçkina, Turketuri Lazepeşk’elen gamaçkvineri maartani grameriş svara do becitoni ar noç’are ren.
Dido 3’anaşen doni Kortulişi ar dialek’t’i ren yado, Lazurişi timoşletineri ar nena oqopinuşi mtinobas var i3’k’edinu na tkumers svaraşi maç’are Munir Yilmaz Avcik, Qini Limaşk’ule na bz’irit 3’anapes na ixvenu xandapete, Lazuri na skidun ar nena na ren oxoi3’onu ya zop’ons. A3’işakis galenuri filologepe do gale na gamiçkvinu xandapeşen met’i Lazuri grameri şeni xveneri ek’o seriozuli ar noç’are na vart’u Turketis, aşo amagi na dvaç’irs ar xanda oxvenu dido beciti ar dulya ren. Skidala muşişi dido beciti ar p’eriodis nananena Lazuri k’ala na skidun, Lazuri dido k’ai na uçkins do doloxeni do galeni çkar mitişi var noşveluten maartani fara Lazuri grameri na ç’aru Avcik, ist’orias ağani ar but’k’a gon3’k’u.
Svaraşi go3’otkvalas; “Ar nenaşi fonet’ik’uri, morfologiuri do sent’ak’siuri st’ruk’t’ura na goşogoraps ar çkinoba na ren grameri, em nenaşi ç’areli nç’araloba eçkindinu şeni dido beciti ren. Emuşeni, spero muşis maarta na ren “Nenaçkina”, Lazuri moxtasneri genera3iapeşa nunç’işinu şeni dido beciti ar xanda ren. Ar k’ult’ura oçvu şeni nena muk’onari dvaç’irs na, nena oçvu şeniti em nenas gza na o3’iraps gramerişi k’aidepe oçkinu ek’onari dvaç’irs,” itkven.
|
TÜRKÇE
