|
NEPERİTEN K'VİNÇİ OÇ'OPİNU
Lazepes k’vinçi oç’opinuşi çkvadoçkva met’odepe uğunan. Am met’odepeşen namtinepe; Neperi, Ok’vinçe, Ragi do Kandara ren. Xopas neperiten k’vinçi oç’opinu, germa Sultan Selimişi nanç’inerot 500-600 met’ro mağalobaloni rak’anepes ixvenen. İrişen çinoberi oç’opinalepe, dido mcveşi ist’oriaşen doni xveneri na ren, Azlağaşi rak’anapes na ren Dolok’alaşi mt’k’uri t’orocişi do Mxigis na ren mç’ipe k’vinçişi oç’opinale ren.
Neperiten k’vinçi oç’opinu şeni mt’k’as, m3’k’upi na iqven svalepes ncalepeşi qape ok’vatuten dixa guin3’k’en. Am rak’anapes na geladgin ncalepe xuti-viti 3ali sva, ovro met’ro mağaloba do xut met’ro mçirenobas gon3’k’imu şeni i3xop’inen. Limcişi m3’k’upis te na meçaps am ruba k’vinçepek oputxuşi gza oqopinot ixmarnan. Na guin3’k’u gzalepes jurneç m2 k’onari didi mosape guintxen. Am mosapes op’ice itkven. Na putxun k’vinçepek gontximeri mosape var z’iropan, mosaşa mat’enan do nik’idenan. Gon3’k’imeri gzalepeş jin na putxun k’vinçepe ç’umani do limciş orapes iç’opinenan. Tanoraşen limcişakis aşo met’oditen nanç’inerot juroş k’vinçi na ç’operen meç’ope şigneri ren.
Andğaneri ndğalepes ar t’rade3ia oqopinot na ixvenen am oç’opinu mcveşi orapes oç’k’omaleşi noğiraten ixvenet’u. Am k’vinçepe astaxolo iç’k’omet’u varna oncumonuten işinaxet’u. Edo xolo mç’ipe k’vinçepeşi bundğapeten tişgedvale ixvenet’u. Andğaneri ndğasti neperiten k’vinçi iç’opinen mara hukumetişk’elen, nat’uraluri skidala do mt’k’uri oskedinu şeni ağani k’anonepe 3’ipxeri ren.
|
TÜRKÇE
