|
XURAŞİ NENA TKVANİ İXMART-İ?
Xuraşi nena simada do zmonape çkinişi meğalapu ren, k’ult’urapes çkvaneroba aqven mara kianas irişen dido na ixmarinen nena ren. K’ont’akt’obaş oras çkin var oxovo3’onapt mara xuraşi nena irişen dido na elamçapan fak’t’orepeşen ar teri ren do şilyapeten tkvalaşen menceloni ren. K’oçepeşi oşkendas na ixvenen k’ont’akt’obas, tkvalapes % 20, xonarişi tonis % 30, xuraşi nenas % 50 becitoba uğun. Emuşeniti otkvaloni mesajepeşen umosi dido xuraşi nenaten vik’ont’akt’ept.
Xuraşi nena çkini oxmaruten otkvaloni na var ren işmarepe oxoma3’onenan do perpot k’ont’akt’i maxvenenan. K’oçinobaşi ist’orias k’ont’akt’obaşi gyoç’k’ala na ren xuraşi nena, ora golaxtuşi xark’i nenaşa guiktiru. K’arta k’oçik jest’i na itkven xe do xancalişi işmarepe, mimik’i na itkven nunk’uşi işmarepe ikips do xura muşis çkvadoçkva st’ilepe noçapaps. K’oçepek jest’i, mimik’i do xuraşi işmarepe oxmaruten na ğarğalapanşen çkvaneri oqopinot mtini simada mutepeşi oxo3’onapapan.
Xuraş nenaşi fakt’orepe antepe ren:
-Xuraşi dodginu
-Jest’epe
-Mimik’epe
-Dudiş oxmaru
-Doxunuşi sva o3xunu
-Doxunuşi st’ili
-Dolokunu
-Mo3’ipxu do mak’yaji
-Toliş o3’k’omilu
-K’uçxepeşi oxmaru
-Dodgituşi mendroba
-Na ixmarinen ak’sesuarepe
Xuraşi nena viguratşi, xuraşi çkini nena umosi raxat’i do elaçameri maxmarenan, na vik’ont’akt’ept k’oçepeşi işmarepe umosi perpu oxoma3’onenan do aşopeten elaçameri k’ont’akt’i gemadgenan.
|
TÜRKÇE
