|
K'OÇİS 10 ŞİLYA AMERİK'ANULİ DOLARİ UĞUN, MARA VAR AXARCEN
Madenuri paraşi ok’obğu berepe şeni dido k’ai ar hobi ren mara, ar k’oçi şeni albat eşo var. Amerik’uri ar k’oçi do cuma muşi ar ndğas t’urist’uri gagnapeten kianas çinoberi do beciti noğapeşi mok’itxus kogyoç’k’es. Jur cumak Mp’oli, At’ina, Roma do P’arisişati ides. P’arisişi goşinu, entepe şeni irişen beciti ren. Emuşeni ki, entepek P’arisis ar rest’orant’is imxortt’aşi, ar idias amaxtes, “Namuk ok’abğasunon majuranişen umosi madenuri para yado.” Am cumalepek am idias 30 3’anaş 3’oxle amaxterenan. Na gecginasunon cumak majuranişen ar k’ap’et’i oç’k’omale mogasunt’u, 30 3’ana 3’oxle idias na amaxtes P’arisis artneri rest’orant’is.
Cumalepeşen ar teri am idiaşi gzaten idu do nena na meçu steri madenuri parape ok’obğu. Emuk 30 3’anaş morgvali ar milionişi sent’i na ok’obğ’u 13 gigant’uri yaşik’is doloxe nadoz’in do 3.6 t’onişen met’i monk’anoba na uğun am madenuri parapeten muk dido derdoni ren. Amerik’uri k’oçik madenuri parape k’art’aluri paraşa okturapu şeni dido oraşen doni ar gza gorups. Emuk a3’i 60 3’aneri ren do p’ersionerobaşi p’eriodisti amaxtu . K’art’aluri paraşi pasiten 10 şilya Amerk’anuli dolari na uğun koçis bank’epekti mxuci var meçapan parape şeni. Amerik’uri zavali k’oçik, “A3i mu p’a, so vida? Zate p’ensioneri viqvaminon do oput’e çkimişa vidaminon. Man para çkimi minon. Na moxtasunon paraten ar t’rakt’ori yepç’opaminon do berepe do motalepe çkimi k’ala pskidaminon “ ya tku. Bank’apeşen ar terik k’arta doloniş doloxe 100 dolaroni madenuri paraşi pasi k’art’aluri parot meçamuşa razi iqvu. Tabi am p’rosesisti 20 doloni unons. Holivudis madulyot na ixandeps, bedi goç’veri k’oçik ar k’ele am paraşi oktiramuşen derdoni ren, majura k’eleti idias na amaxtu cuma muşişa şumeri ren. Cuma muşik emuşa ,” Man mutuşen ambari var miğun. Muşi idia? Muşi P’arisişi rest’orant’i? Muşi oç’k’omale?” yado na tkumers şeni.
Amerik’uri zavali k’oçik,” Bere barik memleketişa ides, ma akonaşi umedoni qal-gelakteri kodopskidi. Ğormotik entepeşen razi iqvas, pat’ronepe çkimik izni momçes do na vixandep firmaşi garajis psikidur am naxodili 3.6 t’oni madenuri paraten. İrişen meç’ireli na ren , uoxorceli oskedinu ren. Monç’inobas derdi var bzdip mara qinobas xususurotti qini serepes dido p’at’i xalis viqver.”ya tku do mgarineri aşo noqonu, “Para miğun, var maxarcen, oxorca miqonun var maz’iren. Aya muperi dulya ren? “
|
TÜRKÇE
