|
"YOK"İK EÇİDOXUT 3'ANAŞEN DONİ ADALET'İ MEK'ARBUPS
Turketis mağaligurapa, 1981 3’anas na gamiçkvinu 2547 nomeroni Mağaligurapaşi K’anonite ak’ademiurot, inst’it’ut’ilurot do maktalurot reformişi p’eriodişa amaxtu. Mağaligurapaşi İnst’it’ut’i, Turketişi Resp’ublik’aşi 1982 şi dudk’anonite na i3’opxinu mağaligurapaşi sist’ematen na ik’idu ar dudk’anonuri inst’it’ut’i ren. 2547 nomeroni k’anonite Turketis mteli mağaligurapaşi inst’it’ut’epe Mağaligurapaşi İnst’it’ut’işi (YOK) xes niçinu, ak’ademiape universit’et’epeşa, gamantanuşi inst’it’ut’epe gamantanuşi fak’ult’epeşa guiktirinu do k’onservat’uarepe do p’rofe3ialuri mağalidoguro-nepe universit’et’epeşa niçinu. Aşoten, k’anonişi hukmepeten do dudk’anonişi 130 do 131 nomeroni maddepeten mus na niçinen fonk’sionepe do hak’k’epe k’ala avt’onomiuroba do huk’uk’uri minoba na uğun ar inst’it’ut’i na ren YOKi, mteli mağaligurapa xes na uğun ar inst’it’ut’işa guiktiru.
12 St’aroşinaş regimişi ar genomskide na ren do 6 3’ilva 1981 tariğişen eçidoxut 3’anaşen doni universit’et’epeşi jin ar 3a3i steri na gyodgitun YOKi, ant’i-demok’rat’obaşi, uadalet’obaşi, t’iranobaşi simboli iqu. Na ik’idu ndğaşen doni namtini mamgurepeşi grup’epeşk’elen k’arta 3’anas na ip’rot’estinen YOKi, Turketis a3’i na gedgin 70 (sumeneçdovit) devleturi, 22 (eçidojur) fondiuri oqopinot 92 (otxoneçdovitojur) universit’et’i na oktalaps ar inst’it’ut’i ren. Namtini siviluri xalk’işi organiza3iape, universit’et’işi gurapaşi fonk’sionerepe do mak’aturepeşk’elenti na nidgitinen YOKi, 22 (eçidojur) mak’atureşen teşkileri ren. Antepeşen şkviti P’rezident’oba, şkviti Dudnaziroba, şkviti Universit’et’epeşkendaşi K’onsei, ariti Generaluriofi3erişi Dudmaxvencobaşk’elen muiqonen do mteli mak’aturepe P’rezident’obaşk’elen itasdik’inen.
Turketişi Resp’ublik’a, muşi dudk’anoni, k’anoni, int’erna3ionaluri huk’uk’i do k’ont’rat’epeşi toliten gamantanuşi do gurapaşi hak’k’i do Ğormotişa oceru do na icerinen steri oskedinuşi hak’k’i, adamepeşi na var nidgitinen irişen temeluri hak’k’epeşen ar teri ren. YOKişi, universit’et’epes ti-motferi k’ulani mamgurepeşa oguru şeni izni var meçaminu, gurapaşi hak’k’i gasp’i oxvenu do adalet’i mek’arbu tkvala ren. Huk’uk’işa do adamuri hak’k’epeşa memskvaneri na var ren am p’rak’t’ik’epe, Turketişi int’erna3ionaluri p’rest’ijis zarari meçaps, so3ialuri mo3’qva ok’oxups do so3ialuri k’ont’akt’obape çkini osap’araps. İlimi do t’ek’nologia k’ala molaşinu na dvaç’iren universit’et’epe, mamgurepeşi oşkendas, mamgurepe do gurapaş mak’aturepeşi oşkendas do xalk’iş doloxe ti-motferi do ti-go3’k’eri yado ar p’olemik’a var rentina aşo umemskvanuri z’irapaten işiren do ibri3’en. Huk’uk’urot çodineri na ren p’roblemi, p’olit’ik’urotti oçodinuten so3ialuri mo3’qva otesisu, Hukumeti, P’arlament’o do YOKi steri mteli inst’it’ut’epeşi xeşdulya ren.
Andğaneri ndğas universit’et’epe, mamgurepek na var isimadepan, dobadona do kianaşi p’roblemepeşa quci na var meçapan doguronepe iqu. YOKis ti-moşletineri, demok’rat’ik’uri, adalet’oni do ilmiuri ar st’at’uşa nunç’işinu dvaç’irs. Universit’et’epes xalk’işa gon3’k’imeri do xalk’işi k’aoba şeni xizmet’i na meçaps inst’it’ut’epe oqopinu dvaç’irs. Xe3alapeşi p’olit’ik’uri ok’atupeşen, rek’torepeşi rant’işi ok’ok’idinupeşen do pondepeşi k’omer3ialuri narğepeşen moşletinu dvaç’irs. Aşopeten mağaligurapas mtineburot avt’onomiuri do demok’rat’ik’uri st’at’u o3’opxinu dvaç’irs.
|
TÜRKÇE
