|
AR LEKSİK'ONİ OXAZİRUŞİ GE3ADA: NENAPUNA
“Lazuri-Turkuli Turkuli-Lazuri Leksik’oni”, Metin Ertenişi coxoten Gamamçkumaloba Anahtar Kitaplarişk’elen 2000 3’anas gamiçkvinu. Am leksik’onişi ge3adas, “Turketis maartani fara jur leksik’oni ok’ont’aleri 25.700 tkvala”şi iddia uğun. Dido 3’anaşen doni na moivarinu do omordinu muşis na nidgitinu ar nena şeni na ixvenen mteli xandak onç’eloni ren. Am leksik’oniş ge3adati Turketuri Lazepes anç’eles do ç’it’a na rentina mutepeşi leksik’oniş dvaç’irobas narges.
Svaraşi go3’otkvalas, “Edo muşeni aşo ar leksik’oni oxaziru domaç’iru? Var t’uk’on na, var iqvet’u-i? Andğaşakis var t’u do mu iqveet’u? A3’i leksik’oni ixazirinaşi mu iqvasunon?” steri tkvalobapeten, na qu xandaşi seriozulobaşen dido çkineri na var rt’u na oxoi3’oninen Ertenik, majura k’eleti “…na dovibadit ndğaşen doni na bğarğalapt çkini nena, Lazuri oşinaxu do omordinuşa mxuci meçamu dvaç’irt’u.” tkumers do aşopeten muşi p’aradok’si o3’iraps.
Am leksik’oniş ge3adaşi irişen çkvaneri do mak’itxalepeşa perpoba na meçaps k’ualifik’a3ia, Lazuri-Turkuli do Turkuli-Lazuri oqopinot oxazirinu ren. Turketuri Lazepeşk’elen na var içkinen namtini tkvalape gedumu, ge3adaşi onç’eloni majura k’ualifik’a3ia ren. Lazuri tkvala do masdarepe na uçkin steri gedvalu, svaras na gez’in tkvalapeşi nak’onoba dido o3’iramu şeni masdarepeşi ak’t’ifuri k’ala, pasifuri do k’ausatifuri xalepeti oç’aru do majura fara oxmaru, svaras na ren ağani tkvalapeşi odude uoç’aru, leksik’onis mxuci na meçu k’oçi do odudepe umolaşinu, skidalas na domaç’irnan namtini tkvalape var omralu, Erteniş xenaşi namtini dork’ineri sperope ren.
Turketuri Lazepes andğaneri ndğas acilurot na dvaç’irenan irişen beciti tema, amak’atineri ar “Lazuri-Turkuli, Turkuli-Lazuri” leksik’oni ren. Nananena dido k’ai na uçkins k’oçepeşen teşkili xveneri ar k’omisiaşk’elen xalk’i k’ala oğarğaluten speroşi goşogoru, 3’oxleneri gamaçkvineri t’ekst’epeşi jin oxandu do tkvala omralinu steri gzalepeten na ixazirinasunon ar leksik’onik, Lazuri nenas ç’areli nç’aralobaşi nena oqopinuşa dido nuşvelasunon. Margali nenaçkinerepe do cuma nena Margaluri nenaşi mxuci meçamuti dido beciti iqvasunon. Nananena so3ialuri ar oğodapa ren. Leksik’oni oxazirusti so3ialuri solidaroba dvaç’irs. K’oçepeşi coxo na içinapinen do k’olek’t’iuri oxanduşen na idork’inen leksik’onişi ge3adape, a3’i na ren steri a3’işk’uleti dvaç’iroba çkini var oçodinasunon.
Ok’vanduşi t’ilifonişi nomeri: 0212 518 54 42
|
TÜRKÇE
